தொண்டியில் கடற்கரை பூங்கா அமைக்கப்படுமா?

திருவாடானை அருகே தொண்டியில் மக்கள் பொழுது போக்கிற்காக கடற்கரை பூங்கா அமைக்கப்படவேண்டும் என சமூக ஆர்வலர்கள் கோரிக்கை விடுத்துள்ளனர்.
திருவாடானை தாலுகாவில் உள்ள தொண்டி வளர்ந்து வரும் கடற்கரை நகரமாகும். இங்கு மீன் பிடி தொழில், விவசாயம், வர்த்தகம்  என பல்வேறு தொழில் செய்து வரும் மக்கள் வசித்து வருகின்றனர். தொண்டி என்றாலே துறைமுகம், கடற்கரை என அனைவருக்கும் ஞாபகத்திற்கு வரும். ஆனால் இங்கு இருப்பதோ ஒரே ஒரு படகு நிறுத்தம் மட்டும்தான். இங்குள்ள பாலத்தில் தான் மக்கள் மாலை நேரங்களை கழிப்பர். இப்பகுதி மட்டுமல்லாது வெளி மாவட்டத்தை சேர்ந்த ஏராளமான சுற்றுலா பயணிகளும் தொண்டி கடற்கரைக்கு வருகின்றனர். தொண்டி கடல் பகுதி அலையே இல்லாத ரம்மியமான கடற்கரை ஆகும். எனவே இங்கு ஒரு கடற்கரை பூங்கா அமைக்க வேண்டும் என இப்பகுதி மக்கள் கோரிக்கை விடுத்துள்ளனர். 
இதுகுறித்து வர்த்தக சங்க  தலைவர் சகுபர் சாதிக் கூறியது: தொண்டியில் பல்வேறு வர்த்தக, தொழில் நிறுவனங்கள் இருந்தாலும் பொழுது போக்கிற்கு என்று ஒரு இடம் இல்லை. குழந்தைகள் முதல் முதியவர்கள் வரை மாலை நேரத்தில் தங்களது பொழுதை இனிதாக கழிக்க இங்கு ஓர் கடற்கரை பூங்கா அமைக்க வேண்டும். இது குறித்து பல முறை கோரிக்கை விடுத்தும் பயன் இல்லை. இதனால் இங்கு  வரும் சுற்றுலா பயணிகள் பெரும் ஏமாற்றம் அடைகின்றனர். எனவே சம்பந்தபட்ட துறையினர் தக்க நடவடிக்கை எடுத்து கடற்கரை பூங்கா அமைக்க வேண்டும் என்றார்.