திருச்சியில் இருந்து ராமேசுவரத்துக்கு 120 மாணவர்கள் 250 கி.மீ. விழிப்புணர்வு "ஸ்கேட்டிங்'

திருச்சியில் இருந்து 120 மாணவர்கள் தூய்மை இந்தியா, மரம் நடுதல் போன்றவற்றை பொதுமக்களிடம் விழிப்புணர்வு ஏற்படுத்தும் விதமாக 250 கி.மீ. "ரோலர் ஸ்கேட்டிங்' செய்து ஞாயிற்றுகிழமை ராமேசுவரம் வருகை தந்தனர். 
திருச்சி மாவட்ட ரோலர் ஸ்கேட்டிங் அசோசியேசன் சார்பில் அப்துல் கலாமின் விஷன் 2020, தூய்மை இந்தியா, மரங்கள் நடுவது போன்றவை குறித்து பொதுமக்களிடையே விழிப்புணர்வை ஏற்படுத்துவதற்காக 6 வயது முதல் 14 வயதிற்கு உட்பட்ட 120 "ரோலர் ஸ்கேட்டிங்' மாணவ, மாணவிகள் "ஸ்கேட்டிங்' மூலம் திருச்சியில் இருந்து சனிக்கிழமை புறப்பட்டனர். பின்னர் தேவகோட்டை, தேவிபட்டினம், ராமநாதபுரம் வழியாக சுமார் 250 கி. மீ. தூரத்தை   "ஸ்கேட்டிங்' மூலம் கடந்து ஞாயிற்றுகிழமை  மாலை  ராமேசுவரத்தில் உள்ள குடியரசு முன்னாள் தலைவர் ஏ.பி.ஜே.அப்துல் கலாம் நினைவிடம் வந்தடைந்தனர். 
இந்த பேரணியில் வழிநெடுகிலும் கலாமின் திட்டங்கள் குறித்து பொது மக்களிடம் பிரச்சாரம் செய்தனர். பின்னர் கலாமின் கனவுகளை நினைவாக்க பாடுபடுவோம் என அவரது நினைவிடத்தில் உறுதி மொழி எடுத்து கொண்டனர்.
ராமநாதபுரத்தில் வரவேற்பு: முன்னதாக திருச்சி ரோல்பால் சங்க தலைவர் மனோகரன் தலைமையில் ராமநாதபுரம் வந்த இவர்களுக்கு ராமநாதபுரம் ரோல் பால் அசோசியேஷன் சங்கத்தின் தலைவர் ஆடிட்டர்.ஜெ.ரமேஷ்பாபு, செயலாளர் செந்தில், உறுப்பினர்கள் பாலசரவணன்,பிரகாஷ் உள்ளிட்ட சங்க நிர்வாகிகள் வரவேற்பு அளித்தனர். காகிதத்தால் செய்யப்பட்ட தேசியக் கொடியை மாணவர்கள் அனைவருக்கும் வழங்கியதுடன், அவர்களுக்கு குளிர் பானங்கள், பிஸ்கெட்கள் மற்றும் குடிநீர் உள்ளிட்டவைகளும் அளிக்கப்பட்டது.