ராமநாதபுரத்தில் ஜூன் 9-இல் பொதுவிநியோகத்திட்ட குறைதீர் கூட்டம்

ராமநாதபுரம் மாவட்டத்தில் இம்மாதம் 9 ஆம் தேதி பொது விநியோகத்திட்ட குறை தீர்க்கும் கூட்டம்  ஒன்றியம்  வாரியாக நடத்தப்பட இருப்பதாக மாவட்ட நிர்வாகம் புதன்கிழமை வெளியிட்ட செய்திக்குறிப்பில் தெரிவிக்கப்பட்டுள்ளது.
செய்திக்குறிப்பு விபரம்:  பொதுவிநியோகத் திட்ட குறை தீர்க்கும் கூட்டமானது இம்மாதம் 9 ஆம் தேதி சனிக்கிழமை காலை 10 மணி முதல் நடைபெறும். ராமநாதபுரம் ஒன்றியம் இளமனூர்  கிராம நிர்வாக அலுவலர் சாவடியிலும், ராமேசுவரம் ஒன்றியம் காரன்காட்டிலும், திருவாடானை ஒன்றியம் கீழக்கோட்டையிலும், முதுகுளத்தூர் ஒன்றியம் சித்ரன்குடியிலும், கடலாடி ஒன்றியம் அடஞ்சேரியிலும், கமுதி ஒன்றியம் பேரையூரிலும், கீழக்கரை ஒன்றியம் புக்குளத்திலும் இக்கூட்டம் நடைபெறுகிறது. அப்போது பொதுமக்கள் பொதுவிநியோகத்திட்டம் தொடர்பான குறைகள் மற்றும் மின்னணு குடும்ப அட்டைகளில் பிழைத்திருத்தம், புகைப்படம் பதிவேற்றம் போன்ற குறைகளை நிவர்த்தி செய்து கொள்ளலாம். இவ்வாறு அதில் தெரிவிக்கப்பட்டுள்ளது.