கமுதி அருகே 10 ஆண்டுகளுக்கும் மேலாக ஊருணியில் தேங்கிய கழிவுநீர் அகற்றம்

கமுதி அருகே 10 ஆண்டுகளுக்கும் மேலாக ஊருணியில் தேங்கிய கழிவுநீர் மோட்டார் மூலம் புதன்கிழமை அகற்றப்பட்டது.
   கமுதி அருகே வெள்ளையாபுரம், சிங்கபுலியாபட்டி ஆகிய கிராமங்களுக்கு இடையில் உள்ள ஊருணியில் கடந்த 10 ஆண்டுகளாக கழிவுநீர் தேங்கி, துர்நாற்றம் வீசுவதோடு, இரவு நேரங்களில் பொதுமக்கள் கொசுத்தொல்லையால் அவதிபட்டு, தொற்றுநோயால் பாதிக்கபட்டனர். இதனையடுத்து அப்பகுதி பொதுமக்கள் பேரூராட்சி அலுவலகத்தில் புகார் அளித்தனர். பேரூராட்சி அதிகாரிகள் கழிவு நீரை சாலைக்கு மறுபக்கம் கொண்டு செல்ல பல்வேறு முயற்சிகளை மேற்கொண்டும் பலனில்லை.  இந்நிலையில்,  ஊருணியில் தேங்கிய கழிவுநீரை மோட்டார்கள் மூலம் அகற்றி, சாலையில் துளையிட்டு குழாய் மூலம் சாலைக்கு மறுபக்கம் உள்ள கழிவுநீர் வாய்க்காலில் வெளியேற்றும் பணியில் பேரூராட்சி பணியாளர்கள் புதன்கிழமை ஈடுபட்டனர். பேரூராட்சி செயல் அலுவலர் இளவரசி, பதவி பொறுப்பேற்ற முதல் நாளிலேயே இந்த நடவடிக்கையை எடுத்துள்ளார். இச்செயலுக்கு பொதுமக்கள் வரவேற்பு அளித்துள்ளனர்.