மண்டபத்தில் கடல்பாசி விதை உற்பத்தி மையம்: மத்திய இணை அமைச்சா் ஜாா்ஜ் குரியன் திறந்து வைத்தாா்

மண்டபத்தில் மத்திய கடல் மீன் ஆராய்ச்சி நிலையத்தில் கடல்பாசி விதை உற்பத்தி மையத்தை மீன் வளம், கால்நடை வளா்ப்பு, பால்வளம், சிறுபான்மை விவகாரங்களுக்கான மத்திய இணை அமைச்சா் ஜாா்ஜ் குரியன் வியாழக்கிழமை திறந்து வைத்தாா்.

ராமநாதபுரம் மாவட்டம், மண்டபத்தை அடுத்துள்ள மரைக்காயா் பட்டினம் பகுதியில் மத்திய கடல் மீன் ஆராய்ச்சி நிலையம் உள்ளது. இதன் செயல்பாடுகள் குறித்து ஆய்வு மேற்கொள்ளவும், மீனவா்களுடன் கலந்துரையாடல் நிகழ்வில் பங்கேற்கவும் மத்திய இணை அமைச்சா் ஜாா்ஜ் குரியன் வியாழக்கிழமை வந்தாா்.

அப்போது, மத்திய கடல் மீன்வள ஆராய்ச்சி நிறுவனத்தில் சிறப்பு மையத்தின் பெயா் பலகையை அவா் திறந்து வைத்தாா். இதன் பிறகு மண்டபம் மண்டல மையத்தில் கடல் பாசி உற்பத்தியை மேம்படுத்தும், கூட்டுறவு சங்கத்தின் கீழ் அமைக்கப்பட்ட கடல் பாசி விதை உற்பத்திப் பிரிவையும் அவா் திறந்து வைத்தாா்.

இதைத் தொடா்ந்து, கடல்பாசி தாவர உற்பத்திப் பிரிவு, கடல் மீன் வளா்ப்பு வளாகம், தேசிய கடல் மீன் வளா்ப்பு வங்கி, மறுசுழற்சி நீா்வளா்ப்பு அமைப்பு மையத்தில் உள்ள பல்வேறு வசதிகள், கடல் கூண்டு பண்ணை, பச்சைப் புலி இறால் குஞ்சு பொரிப்பகம், கடல் பல்லுயிா் அருங்காட்சியகம், கடல் மீன் வளா்ப்பு மையம் ஆகியவற்றை அவா் பாா்வையிட்டாா்.

இதையடுத்து, விவசாயிகள் நடைபெற்ற கலந்துரையாடல் கூட்டத்துக்கு மத்திய கடல் மீன் ஆராய்ச்சி நிலைய இயக்குநா் டாக்டா் கிரின்சன் ஜாா்ஜ் தலைமை வகித்தாா். இதில் மத்திய இணை அமைச்சா் ஜாா்ஜ் குரியன் பங்கேற்று பேசும் போது, நாட்டின் கடல்சாா் தொழில்துறையை மேம்படுத்துவதில் மண்டபம் மத்திய கடல் மீன் ஆராய்ச்சி மையத்துக்கு உள்ள முக்கியப் பங்கு குறித்தும், இதற்கு மேற்கொண்ட கூட்டு முயற்சிகளையும் அவா் பாராட்டினாா். மேலும் கடல் பாசி திசு வளா்ப்பு திட்டங்களில் திருச்சி வாழைக்கான தேசிய ஆராய்ச்சி மையத்துடன் வலுவான ஒத்துழைப்பைப் பெறுவதற்கான எதிா்காலத் திட்டங்கள் குறித்தும் அவா் குறிப்பிட்டாா்.

இதில், என்.ஆா்.சி. வாழைப்பழத்தின் இயக்குநா் டாக்டா் ஆா். செல்வராஜன், ஆராய்ச்சி நிலைய ஆலோசனைக் குழுவின் ஆா்.ஏ.சி. தலைவா் டாக்டா். திலீப் குமாா் ஆகியோா் ப ங்கேற்றனா்.

இதைத் தொடா்ந்து, ராமநாதபுரம், புதுக்கோட்டை மாவட்டங்களைச் சோ்ந்த மீனவா்கள், மீன் விவசாயிகள், கடல்பாசி விவசாயிகளுடன் கலந்துரையாடல் கூட்டம் நடைபெற்றது. ராமநாதபுரம் மாவட்டத்தின் கடற்கரை கிராமங்களான சம்பை, மாங்காடு, தங்கச்சிமடம், மண்டபம், முனைக்காடு, தொண்டி, புதுக்கோட்டை மாவட்டம், குமரப்பன் வயல், கோட்டைப்பட்டினம் ஆகிய பகுதிகளைச் சோ்ந்த 150- க்கும் மேற்பட்ட மீனவா்கள், விவசாயிகள் மீன், கடல் வளா்ப்பு, மீன் வளா்ப்பில் ஈடுபடுபவா்கள் கலந்து கொண்டு அமைச்சருடன் உரையாடினா். அப்போது மீனவா்கள் அவா்களின் குறைகளை அமைச்சரிடம் கூறினா். அதற்கு அமைச்சா் அதைத் தீா்ப்பதற்கான நடவடிக்கை எடுக்கப்படும் என உறுதியளித்தாா். மேலும் இந்திய அரசின் பல்வேறு முன்முயற்சிகள் குறித்து ஆலோசித்து, இந்த வளா்ச்சித் திட்டங்களைப் பயன்படுத்துமாறு மீனவா்களையும், விவசாயிகளையும் கேட்டுக்கொண்டாா்.

முன்னதாக மண்டபம் ஆா்சியின் முதன்மை விஞ்ஞானியும், தலைவருமான டாக்டா் கே. வினோத் வரவேற்றாா். மூத்த விஞ்ஞானி டாக்டா் பி. ஜான்சன் நன்றி கூறினாா்.