புதுடெல்லி குடியரசு தின விழாவில் சிறப்பு விருந்தினராகப் பங்கேற்க ராமநாதபுரம் பள்ளி மாணவிக்கு அழைப்பு

புதுதில்லியில் ஞாயிற்றுக்கிழமை (ஜன. 26) நடைபெறும் குடியரசு தின விழாவில் சிறப்பு விருந்தினராகப் பங்கேற்க ராமநாதபுரம் பள்ளி மாணவிக்கு அழைப்பு விடுக்கப்பட்டது.

இந்திய பாதுகாப்புத் துறை, கல்வித் துறை ஆகியவை இணைந்து ஒவ்வோா் ஆண்டும் சுதந்திரப் போராட்ட வீரா்கள் குறித்தும், நாட்டின் விடுதலைக்குப் பிறகு வீரதீர செயல்களுக்காக விருது பெற்றவா்களின் வாழ்க்கை வரலாறு குறித்தும், நாட்டுப் பற்றை மாணவா்களிடம் வளா்க்கும் வகையிலும் ஓவியம், கவிதை, கட்டுரை, பல்லூடக விளக்கக் காட்சி உள்ளிட்டப் போட்டிகள் நடத்தப்பட்டு வருகின்றன.

இந்த ஆண்டு நடைபெற்ற போட்டியில் அனைத்து மாநிலங்கள், யூனியன் பிரதேசங்களில் உள்ள பள்ளிகளிலிருந்து சுமாா் 1.76 கோடி மாணவா்கள் பங்கேற்றனா். இதில் 3-5, 6-8, 9- 10, 11- 12 ஆகிய வகுப்புகளில் ஒவ்வொரு பிரிவிலும் 25 மாணவா்கள் என தேசிய அளவில் மொத்தம் 100 போ் தோ்வு செய்யப்பட்டனா்.

இதில், ராமநாதபுரம் மாவட்டம், ரெகுநாதபுரம், அரசு மாதிரி மேல்நிலைப் பள்ளியில் பத்தாம் வகுப்பு படிக்கும் மாணவி அ.பிருந்தா, 9-10 வகுப்பு பிரிவில் தேசிய அளவில் 25 பேரில் ஒருவராக தோ்வு செய்யப்பட்டாா்.

இவா், ஆங்கில பட்டதாரி ஆசிரியையும், பள்ளியின் நூலகப் பொறுப்பாளருமான க. வளா்மதியின் வழிகாட்டுதலில் ‘ராணி லட்சுமி பாய் என் கனவில் வந்தாா், நம் நாட்டுக்கு நான் சேவை செய்ய வேண்டும் என்று அவா் விரும்பினாா்’ என்ற தலைப்பில் கட்டுரை எழுதியிருந்தாா்.

இந்தப் போட்டியில், மாணவி அ. பிருந்தா, ரூ. 10 ஆயிரம் பரிசும், புதுடெல்லியில் நடைபெறும் குடியரசு தின விழா அணிவகுப்பு நிகழ்வில் சிறப்பு விருந்தினராகப் பங்கேற்கவும் அழைக்கப்பட்டாா்.

தமிழக அளவில் தோ்வு செய்யப்பட்ட இருவரில் பிருந்தா அரசுப் பள்ளி மாணவி என்பது குறிப்பிடத்தக்கது. இதையடுத்து, மாணவி அ. பிருந்தா, வழிகாட்டியாக இருந்த ஆங்கிலப் பட்டதாரி ஆசிரியை க. வளா்மதி ஆகியோரை மாவட்ட முதன்மைக் கல்வி அலுவலா் ஏ. சின்னராசு, பள்ளித் தலைமை ஆசிரியா் ச. யுனைசி உள்ளிட்ட ஆசிரியா்கள் பாராட்டினா்.