மணல் திருட்டு: இருவா் கைது

தொண்டி அருகே மல்லனூா் ஆற்றுப் பகுதியிலிருந்து சட்டவிரோதமாக டிராக்டா், சரக்கு வேனில் மணல் கடத்திவந்த இருவரை கைது செய்த போலீஸாா் மேலும் இருவரைத் தேடி வருகின்றனா்.

தொண்டி அருகே மல்லனூா் ஆற்றுப் பகுதியில் போலீஸாா் வழக்கம்போல ரோந்துப் பணியில் ஈடுபட்டனா். இந்த நிலையில் திங்கள்கிழமை இரவு ஆற்றுப் பகுதியிலிருந்து மணல் ஏற்றிக்கொண்டு வந்த இரண்டு வாகனங்களை நிறுத்திச் சோதனை செய்தனா். அதில் சட்டவிரோதமாக ஆற்று மணல் கடத்தி வரப்பட்டது தெரியவந்தது.

இதையடுத்து மணல் திருட்டில் ஈடுபட்டதாக, மல்லனூா் பகுதியைச் சோ்ந்த சதீஷ்குமாா் (34), நாகப்பட்டினம் மாவட்டம் ஒரத்தூா் பகுதியைச் சோ்ந்த பிரவீன் (22) ஆகிய இருவரையும் போலீஸாா் கைது செய்தனா். இந்தச் சம்பவத்தில் தொடா்புடைய மல்லனூா் பகுதியைச் சோ்ந்த மேலும் இருவரைத் தேடி வருகின்றனா். இந்தச் சம்பவத்தில் பயன்படுத்தப்பட்ட டிராக்டா், சரக்கு வாகனத்தை போலீஸாா் பறிமுதல் செய்தனா்.