மானாமதுரையில் சுழற்சி முறையில் குடிநீர் விநியோகம்: பேரூராட்சி நிர்வாகம் அறிவிப்பு

மானாமதுரை நகரில் செவ்வாய்க்கிழமை முதல் ஒருநாள் விட்டு  ஒருநாள் சுழற்சி முறையில் குடிநீர் விநியோகிக்கப்பட உள்ளதாக பேரூராட்சி நிர்வாகம் அறிவித்துள்ளது.

   மானாமதுரை நகர் குடிநீர் திட்டம், ராஜகம்பீரம் வைகையாற்றுக்குள் செயல்பட்டு வருகிறது.

  இங்கிருந்து குழாய்களில் கொண்டு வரப்படும் குடிநீர் நகரில் பல இடங்களிலுள்ள மேல்நிலைத்தொட்டிகளில் ஏற்றப்பட்ட பின் குழாய் இணைப்புகளுக்கு வழங்கப்படுகிறது. இந்நிலையில் தற்போது மானாமதுரை பகுதியில் கடும் வெயில் காரணமாக வறட்சி ஏற்பட்டுள்ளது. இதன் காரணமாக குடிநீர் திட்டத்தில் நீராதாரம் வெகு வேகமாக குறைந்து தேவைக்கு ஏற்ப குடிநீர் எடுக்க முடியாத நிலை ஏற்பட்டுள்ளது.    இதனால் குடிநீர் பற்றாக்குறையை சமாளிக்க மானாமதுரை நகர் பகுதியில் ஒவ்வொரு பகுதிக்கும்  ஒருநாள் விட்டு ஒருநாள் சுழற்சி முறையில் குடிநீர் விநியோகிக்க பேரூராட்சி நிர்வாகம் முடிவு செய்துள்ளது.

   அதன்படி செவ்வாய்க்கிழமை முதல் இத்திட்டம் அமல்படுத்தப்படவுள்ளதாகவும், பொதுமக்கள் குடிநீரை வீணாக்காமல் சிக்கனமாக பயன்படுத்த வேண்டும் என்றும் மானாமதுரை பேரூராட்சி நிர்வாகம்  கேட்டுக்கொண்டுள்ளது.