வைகை அணையில் இருந்து நீர் திறப்பு: சிவகங்கை மாவட்ட மக்களுக்கு எச்சரிக்கை

வைகை அணையில் விநாடிக்கு 3,336 கன அடி நீர் திறக்கப்பட்டுள்ளதை அடுத்து,சிவகங்கை மாவட்டத்தில் வைகையாற்றில் பொதுமக்கள் யாரும் இறங்க வேண்டாம் என எச்சரிக்கை விடுக்கப்பட்டுள்ளது.    
இதுகுறித்து சிவகங்கை மாவட்ட ஆட்சியர் க.லதா ஞாயிற்றுக்கிழமை வெளியிட்டுள்ள செய்திக் குறிப்பு: வைகை அணையில் இருந்து ஞாயிற்றுக்கிழமை மாலை முதல் அணையில் இருந்து நொடிக்கு 3,336 கன அடி நீர் திறக்கப்பட்டுள்ளது.  ஆகவே, சிவகங்கை மாவட்டத்தில் வைகையாற்றின் கரையோரப் பகுதியில் வசிக்கும் பொதுமக்கள் ஆற்றில் இறங்கவோ, குளிக்கவோ கூடாது. மேலும் கால்நடைகளையும் மேய்ச்சலுக்காக வைகையாற்றில் அழைத்துச் செல்வதையும் தவிர்க்க வேண்டும். வைகை அணையில் திறக்கப்பட்டுள்ள தண்ணீர் அதிகமாக வருவதால்  பாதுகாப்பு முன்னேற்பாடுகள் அனைத்தும் தயார் நிலையில் உள்ளன என அதில் தெரிவிக்கப்பட்டுள்ளது.