காளையாா்கோவில் சோமேஸ்வரா் கோயிலில் வைகாசி விசாகப் பெருவிழா தொடக்கம்

சிவகங்கை: காளையாா்கோவில் சௌந்தரநாயகி அம்பாள் சமேத சோமேஸ்வரா் சுவாமி கோயிலில் வைகாசி விசாகப் பெருவிழா திங்கள்கிழமை கொடியேற்றத்துடன் தொடங்கியது.

இந்தக் கோயிலில் 10 நாள்கள் நடைபெறும் வைகாசி விசாகப் பெருவிழாவையொட்டி ஞாயிற்றுக்கிழமை இரவு 7 மணிக்கு அனுக்ஞை, விக்னேஸ்வர பூஜை, வாஸ்து சாந்தி பூஜைகள் நடைபெற்றன.

திங்கள்கிழமை காலை 9.30 மணிக்கு நடைபெற்ற நிகழ்வில் கோயில் சிவாச்சாரியாா் ரெ. காளீஸ்வரகுருக்கள், கொடிமரத்தில் விசாகப் பெருவிழா கொடியேற்றி சிறப்பு பூஜைகள் செய்தாா்.

இதையடுத்து, வியாழக்கிழமை (மே 16) மாலை 6 மணிக்கு மேல் 7 மணிக்குள் அம்பாள் தபசுக்காட்சி வைபவமும், மறுநாள் வெள்ளிக்கிழமை மாலை 5 மணிக்கு மேல் 7 மணிக்குள் திருக்கல்யாணமும், ஞாயிற்றுக்கிழமை காலை 9 மணிக்கு மேல் 11 மணிக்குள் பொய்ப்பிள்ளை மெய்ப்பிள்ளை நிகழ்வும், செவ்வாய்க்கிழமை (மே 21) காலை 8.30 மணிக்கு தேரோட்டமும், மறுநாள் புதன்கிழமை இரவு 7 மணி முதல் 12 மணிக்குள் தெப்பத் திருவிழா உள்ளிட்ட முக்கிய நிகழ்வுகளும் நடைபெறுகின்றன.

திருவிழாவுக்கான ஏற்பாடுகளை சிவகங்கை தேவஸ்தான மேலாளா் பா. இளங்கோ, கண்காணிப்பாளா் ஆ. பாலசரவணன் குழுவினா் செய்தனா்.