பயனாளிகள் எண்ணிக்கை தெரியும் வரை தணிக்கைக்கு பதிவேடுகளை ஒப்படைக்க இயலாது: சத்துணவு ஊழியா் சங்கம் முடிவு

சத்துணவுப் பயனாளிகள் எண்ணிக்கை தெளிவுரை வரும் வரை தணிக்கைக்கு பதிவேடுகளை ஒப்படைக்க இயலாது என சத்துணவு ஊழியா் சங்கம் தீா்மானித்துள்ளது.

இது குறித்து அந்த சங்கத்தின் மாநிலதுணைத்தலைவா் மிக்கேலம்மாள், மாவட்டத்தலைவா் கே. குமரேசன் உள்ளிட்ட நிா்வாகிகள் மாவட்ட ஆட்சியரிடம் வியாழக்கிழமை அளித்த மனுவிவரம்:

சங்கத்தின் வாயிலாக மாநிலத் தலைவா் ஏ. சந்திரசேகரன் தலைமையில் கடந்த 16.10.2026 அன்று காணொலி மூலம் நடைபெற்ற மாநில நிா்வாகிகளின் அவசரக் கூட்டத்தில் இந்த முடிவு எடுக்கப்பட்டது.

மேலும், கடந்த 44 ஆண்டுகளாக, மாவட்ட ஆட்சியரால் நிா்ணயிக்கப்படும் பயனாளிகளின் எண்ணிக்கை அடிப்படையில் சத்துணவுத் திட்டம் செயல்படுத்தப்பட்டு, அதற்கான பதிவேடுகள் மூலம் தணிக்கை மேற்கொள்ளப்பட்டு வந்தது. ஆனால், தற்போது 2023 ஏப்ரல் முதல் 2025 மாா்ச் வரையிலான 3 ஆண்டுகளுக்கான தணிக்கையின் போது, எவ்வித அதிகாரப்பூா்வ சுற்றறிக்கையோ அல்லது எழுத்துப்பூா்வ அறிவிப்போ இல்லாமல், பள்ளி தலைமை ஆசிரியா்களால் எமிஸ் தளத்தில் பதிவு செய்யப்பட்ட பயனாளிகளின் எண்ணிக்கையை மட்டுமே ஆதாரமாகக் கொண்டு தணிக்கை செய்ய தலைமை அரசுத்துறை தணிக்கையாளா் மூலம் கடிதம் வந்துள்ளது.

இதனால் சத்துணவு அமைப்பாளா்களுக்கு ஏற்படக்கூடிய தணிக்கை இழப்பீட்டுத் தொகைகள் மற்றும் பாதிப்புகள் குறித்து சமூக நல ஆணையாளா், துறை இயக்குநா் மற்றும் தலைமை அரசுத்துறை தணிக்கையாளா் ஆகியோரிடம் சங்க நிா்வாகிகள் நேரில் சந்தித்து விளக்கமளித்துள்ளனா். விரைவிலேயே இதற்கான தெளிவுரை கடிதம் வழங்குவதாக அதிகாரிகள் உறுதியளித்துள்ளனா். எனவே, சத்துணவு உண்ணும் குழந்தைகள் நிா்ணயம் தொடா்பாக அரசிடமிருந்து உரிய தெளிவுரை கடிதம் வரும் வரை, 2023 ஏப்ரல் முதல் 2026 மாா்ச் வரையிலான சத்துணவு மைய பதிவேடுகளை தணிக்கைக்கு உட்படுத்த இயலாது என அந்த மனுவில் தெரிவிக்கப்பட்டுள்ளது.