ஊதியக்குழு அமைக்க வலியுறுத்தி அஞ்சல் ஊழியா்கள் ஆா்ப்பாட்டம்

கிராமிய அஞ்சல் ஊழியா்களுக்கு உடனடியாக ஊதியக் குழு அமைக்க வலியுறுத்தி தஞ்சாவூா் தலைமை அஞ்சலகம் முன் அஞ்சல் ஊழியா்கள் செவ்வாய்க்கிழமை மாலை ஆா்ப்பாட்டத்தில் ஈடுபட்டனா்.

தேசிய அஞ்சல் ஊழியா் சங்கம், அனைத்திந்திய அஞ்சல் ஊழியா் சங்கம், அகில இந்திய கிராமிய அஞ்சல் ஊழியா் சங்கம், பன்முகத்திறன் கிராமிய அஞ்சல் ஊழியா் சங்கம் ஆகியவை சாா்பில் நடைபெற்ற ஆா்ப்பாட்டத்தில் கிராமிய அஞ்சல் ஊழியா்களுக்கு உடனடியாக ஊதியக்குழு அமைக்க வேண்டும். நிலுவையில் உள்ள படி, ஓய்வூதியம், 180 நாள்கள் ஊதியத்துடன் விடுப்பு ஆகியவற்றை உடனடியாக அமல்படுத்த வேண்டும். ஊழியா்களை அலுவலா்கள் வஞ்சிப்பதைக் கைவிட வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.

ஆா்ப்பாட்டத்துக்கு மாவட்டக் கிளைத் தலைவா் பி. ரமேஷ் தலைமை வகித்தாா். கிளைச் செயலா்கள் எஸ். ராஜ்குமாா், எஸ். வெங்கடாஜலபதி, எம். தனசேகரன், ஆா். கருப்புசாமி உள்ளிட்டோா் கலந்து கொண்டனா்.