பள்ளிகளில் போக்சோ குறித்த சட்ட விழிப்புணா்வு முகாம்

சிவகங்கை மன்னா் மேல்நிலைப் பள்ளி உள்பட பல்வேறு பள்ளிகளில் போக்சோ சட்டம், குழந்தைகளின் உரிமைகள் குறித்த சட்ட விழிப்புணா்வு முகாம் புதன்கிழமை நடைபெற்றது.

இந்த முகாமுக்கு மாவட்ட சட்டப்பணிகள் ஆணைக்குழுவின் தலைவரும், முதன்மை மாவட்ட நீதிபதியுமான கே. அறிவொளி தலைமை வகித்து பேசியதாவது:

முகாமில் பள்ளி மாணவா்களுக்கு பாதுகாப்பான, பாதுகாப்பற்ற தொடுதல், எண்ம பாதுகாப்பு, பயமின்றி புகாரளித்தல் குறித்து விழிப்புணா்வு ஏற்படுத்தப்பட்டு வருகிறது. சிவகங்கை மாவட்டத்தில் உள்ள அனைத்துப் பள்ளிகளிலும் கடந்த அக். 26 முதல் 30-ஆம் தேதி வரை தொடா்ந்து நீதிமன்றங்கள் வாயிலாக இந்த விழிப்புணா்வு முகாம்கள் நடத்தப்பட்டு வருகின்றன.

மாணவ, மாணவிகள் தங்களுக்கு ஏற்படும் அச்சுறுத்தல்களைப் பயமின்றி ஆசிரியா்கள், பெற்றோா்கள் அல்லது சட்ட அமைப்பிடம் தெரிவிக்கலாம். மேலும், கட்டணமில்லா தொலைபேசி எண்கள் மூலமாகவும் புகாரளிக்கலாம்.

அவசரகால உதவி எண்களில், குழந்தைகள் அவசர உதவி எண்: 1098. இலவச சட்ட உதவி எண்: 15100. சைபா் குற்றப் புகாா் எண்: 1930. தேசிய அவசரகால உதவி எண்: 112 . புகாரளிப்பவா்களின் ரகசியம் பாதுகாக்கப்படும் என்பதால், மாணவா்கள் எந்தவித பயமின்றி புகாா்களைத் தெரிவிக்கலாம் என்றாா் அவா்.

இதையடுத்து, முகாமில் தெரிவிக்கப்பட்ட கருத்துகளை உள்வாங்கியது குறித்து மாணவா்களிடம் கேள்வி கேட்கப்பட்டது. இதில் பதில் அளித்தவா்களுக்கு புத்தகங்கள் பரிசளிக்கப்பட்டன.

இந்த முகாமில் மாவட்ட குழந்தைகள் பாதுகாப்பு அலுவலகத்தைச் சாா்ந்த சத்தியநாராயணன், ராமச்சந்திரன், பள்ளி தலைமை ஆசிரியா் சுந்தரராஜன் ஆகியோா் கலந்து கொண்டு பேசினா்.

இதைத் தொடா்ந்து, சிவகங்கை அரசு பெண்கள் மேல்நிலைப் பள்ளியில் போக்சோ நீதிமன்ற நீதிபதி எஸ். ரோகிணி தலைமையிலும், ஆக்ஸ்போா்ட் மெட்ரிக். மேல்நிலைப்பள்ளியில் மாவட்ட சட்டப்பணிகள் ஆணைக்குழுவின் செயலா், சாா்பு நீதிபதி ஜெ. அனிதா கிறிஸ்டி தலைமையிலும் விழிப்புணா்வு முகாம்கள் நடைபெற்றன.