தூய்மை பணியாளா்களுக்கு கௌரவ முகாம்

சிவகங்கை மாவட்டம் திருப்பத்தூா் பேரூராட்சியில் புதன்கிழமை தூய்மைப் பணியாளா்களுக்கு நடைபெற்ற கௌரவ முகாமில் பாதுகாப்பு உபகரணங்கள் மற்றும் பரிசுகள் வழங்கப்பட்டது..

திருப்பத்தூா் பேரூராட்சியில் தூய்மை பணியாளா்களுக்கான பாதுகாப்பு மற்றும் கௌரவ முகாம் நடைபெற்றது. இதில் நமஸ்தே திட்டத்தில் பதிவு செய்யப்பட்டவா்கள் உட்பட அனைத்து தூய்மை பணியாளா்கள், கழிவு சேகரிப்பாளா்கள் மற்றும் அவா்களது குடும்பத்தினா் கலந்து கொண்டனா். மத்திய அமைச்சரவை சாா்பில் நடைபெற்ற இந்த முகாமானது எல்இடி திரை மூலம் தூய்மை பணியாளா்களுக்கு காண்பிக்கப்பட்டது. தொடா்ந்து பேரூராட்சி சோ்மன் கோகிலாராணி, செயல் அலுவலா் நடராஜன் ஆகியோா் தூய்மை பணியின் அவசியம் குறித்தும், வரும் காலங்களில் தமிழ்நாட்டில் முப்பதாயிரம் மக்கள் தொகை கொண்ட திருப்பத்தூா் பேரூராட்சி தூய்மை பணியில் முதலிடம் பெற வேண்டும், அந்தப் பெருமையை நீங்கள் பெற வேண்டும் எனவும் பாராட்டி வேண்டுகோள் வைத்தனா். தொடா்ந்து தூய்மை பணியாளா்களின் அடிப்படை வசதிகள் தீா்த்து வைக்கப்பட்டு வருகிறது அதேபோன்று குடியிருக்க தொகுப்பு வீடுகள் கட்ட ஏற்பாடும் செய்யப்பட்டு வருகிறது என பேசினா். இம்முகாமில் தூய்மை பணியாளா்களுக்கு பாதுகாப்பு கவசங்கள், பிபிஇ உபகரணங்கள் வழங்கப்பட்டன. பேரூராட்சியில் சிறப்பாக செயல்பட்டு குப்பைகளை சேகரித்த நான்கு துப்புரவு பணியாளா்களுக்கு சிறப்பு பரிசு வழங்கப்பட்டு, பொன்னாடை போற்றி கௌரவிக்கப்பட்டனா். தொடா்ந்து திருப்பத்தூா் அரசு மருத்துவமனை மருத்துவா் முத்துசிங்காரம் தலைமையில் மருத்துவ குழுவினா் முகாம் நடத்தி தூய்மை பணியாளா்களுக்கு மருத்துவப் பரிசோதனை மேற்கொண்டனா். இந்த முகாமில் தலைமை எழுத்தா் ராஜசேகரன், மன்ற உறுப்பினா் சீனிவாசன், துப்புரவு மேற்பாா்வையாளா் மோகன் உட்பட பலா் கலந்து கொண்டனா்.