பூமலைக்குண்டு கிருஷ்ணமூர்த்தி பெருமாள் கோயிலில் தேர்த் திருவிழா

தேனி அருகே பூமலைக்குண்டு கிருஷ்ணமூர்த்தி பெருமாள் கோயிலில் வைகுண்ட ஏகாதசியையொட்டி தேர்த்திருவிழா புதன்கிழமை நடைபெற்றது. சுமார் 25 ஆண்டுகளுக்கு பின்னர் இந்த விழா நடைபெறுகிறது.
   விழாவையொட்டி செவ்வாய்க்கிழமை ஊர் மக்கள் சார்பில் திருவிளக்கு பூஜை மற்றும் நகர்வலம் நடைபெற்றது. புதன்கிழமை அதிகாலை 1.30 மணியளவில் விநாயகர் கோயிலிருந்து கைசப்பரம் மற்றும் பூஜை பொருள்கள் கொண்டுவரப்பட்டது. பின்னர் அதிகாலை 5 மணிக்கு மாவிளக்கு ஊர்வலம் எடுத்துவரப்பட்டது. அதன் பிறகு காலை 7.15 மணிக்கு பெரிய தேரில் சுவாமி எழுந்தருளியதைத் தொடர்ந்து தேர் புறப்பாடு நடைபெற்றது.
மாலை 3 மணியளவில் ஊர்பொதுமக்கள் சார்பில் பொங்கல் வைத்தல் நிகழ்ச்சி நடைபெற்று. இந்நிகழ்ச்சியில் ஏராளமான பொதுமக்கள் கலந்து கொண்டனர். மேலும் வியாழக்கிழமை காலை தேர் புறப்பாடாகி நிலையை வந்தடைதல் மற்றும் மஞ்சள் நீராட்டுதல் நிகழ்ச்சியுடன் விழா நிறைவு பெறுகிறது. இந்நிகழ்ச்சிக்கான ஏற்பாடுகளை பூமலைக்குண்டு கிராமத்தினர் செய்திருந்தனர்.