கிராமப்புற வங்கிகளின் கடன் வழங்கல் 10.3% அதிகரிப்பு

கடந்த 2025-26-ஆம் நிதியாண்டில், நாட்டின் பிராந்திய கிராமப்புற வங்கிகளின் மொத்த கடன் வழங்கல் 10.3 சதவீதம் அதிகரித்து, ரூ.5,78,349 கோடியை எட்டியுள்ளது.

கடந்த 2024-25 நிதியாண்டின் முடிவில் இக்கடன் அளவு ரூ.5,24,163 கோடியாக இருந்த நிலையில், நிதிச் சோ்க்கையை விரிவுபடுத்துவதிலும் கிராமப்புறப் பொருளாதாரத்தை வலுப்படுத்துவதிலும் கிராமப்புற வங்கிகள் குறிப்பிடத்தக்க வளா்ச்சியைப் பதிவு செய்துள்ளன.

ரிசா்வ் வங்கி நிா்ணயித்த முன்னுரிமைத் துறை கடன் வழங்கல் இலக்கான 75 சதவீதத்தைத் தாண்டி, சராசரியாக 91.7 சதவீத சாதனையை இந்த வங்கிகள் எட்டியுள்ளன.

இதில் அதிகபட்சமாக வேளாண்மை மற்றும் அதைச் சாா்ந்த தொழில்களுக்கு ரூ.3.78 லட்சம் கோடி கடன் வழங்கப்பட்டுள்ளது. இது மொத்த முன்னுரிமைத் துறை கடன்களில் 77 சதவீதமாகும்.

மேலும், வேளாண் கடன்களில் சுமாா் 98 சதவீதம், பயிா் சாகுபடி, துணைத் தொழில்கள் மற்றும் கிராமப்புற பொருளாதார முதலீடுகளுக்காக வழங்கப்பட்டுள்ளது.

எம்எஸ்எம்இ தொழில் நிறுவனங்களுக்கு ரூ.66,978 கோடி (முன்னுரிமைத் துறை கடனில் 13.6 சதவீதம்) கடன் வழங்கப்பட்டுள்ளது. இதில் 95 சதவீதத்துக்கும் அதிகமான கடன் தொகை குறுதொழில் நிறுவனங்களுக்கும், முதல் தலைமுறை தொழில்முனைவோா் மற்றும் கிராமப்புற கைவினை கலைஞா்களுக்கு வழங்கப்பட்டுள்ளது.

மேலும், சமுதாயத்தின் பின்தங்கிய மற்றும் எளிய பிரிவினருக்கு ரூ.3.49 லட்சம் கோடி கடன் வழங்கி, கடன் வசதி எளிதில் கிடைக்க கிராமப்புற வங்கிகள் வழிவகை செய்துள்ளதாகத் தெரிவிக்கப்பட்டுள்ளது.