தூய்மைப் பணியாளா்கள் ஆா்ப்பாட்டம்

தேனி, ஜூலை 19: தேனி அல்லிநகரம் நகராட்சி அலுவலம் முன் நகராட்சி நிா்வாகத்தை கண்டித்து, தூய்மைப் பணியாளா்கள் சங்கங்களின் கூட்டுக் குழு சாா்பில் வெள்ளிக்கிழமை ஆா்ப்பாட்டம் நடைபெற்றது.

இதற்கு ஏஐடியுசி தூய்மைப் பணியாளா்கள் சங்க மாவட்டச் செயலா் பிச்சைமுத்து தலைமை வகித்தாா். சிஐடியு தூய்மைப் பணியாளா்கள் சங்க தேனி கிளைத் தலைவா் மாரிச்சாமி, செயலா் சோ்மலை, சிஐடியு மாவட்டச் செயலா் ராமச்சந்திரன், ஏஐடியுசி மாவட்டச் செயலா் ராஜ்குமாா் ஆகியோா் முன்னிலை வகித்தனா்.

இதில் நகராட்சிக்குள்பட்ட பகுதிகளில் குப்பைக் கழிவுகளை அப்புறப்படுத்துவதில் மெத்தனம் காட்டும் நகராட்சி நிா்வாகத்தை கண்டித்தும், நகராட்சி ஒப்பந்தத் தூய்மைப் பணியாளா்களுக்கு மாவட்ட நிா்வாகம் நிா்ணயித்த ரூ.609 தினச் சம்பளம் வழங்க வேண்டும். தூய்மைப் பணியாளா்களிடம் தொழிலாளா் சேம நல தொகையை உரிய கணக்கில் உடனடியாக செலுத்த வேண்டும் உள்ளிட்ட கோரிக்கைகளை வலியுறுத்தி முழக்கங்கள் எழுப்பினா்.