இருக்கன்குடி மாரியம்மன் கோயில் ஆடித் திருவிழா ஆலோசனைக் கூட்டம்

விருதுநகர் மாவட்டம் சாத்தூர் அருகே உள்ள இருக்கன்குடி மாரியம்மன் கோயில் ஆடித் திருவிழா தொடர்பான ஆலோசனைக் கூட்டம் புதன்கிழமை நடைபெற்றது.
இக்கோயிலில் முக்கிய திருவிழாவான ஆடித்திருவிழா வரும் வெள்ளிக்கிழமை (ஆக. 3ஆம் தேதி) கொடியேற்றத்துடன் தொடங்குவதையடுத்து இப்பகுதியில் அடிப்படை வசதிகள் செய்து தருவது மற்றும் பாதுகாப்பு ஏற்பாடுகள் செய்வது தொடர்பான ஆலோசனைக் கூட்டம் சாத்தூர் வட்டாட்சியர் அலுவலகத்தில் நடைபெற்றது. 
இதற்கு சாத்தூர் கோட்டாட்சியர் மங்களராமசுப்பிரமணியன் தலைமை வகித்தார். இதில் சாத்தூர் வட்டாட்சியர் சாந்தி, காவல்துறை துணைக் கண்காணிப்பாளர் மதியழகன் ஆகியோர் முன்னிலை வகித்தனர். கூட்டத்தில் இருக்கன்குடி, நத்தத்துப்பட்டி, கே.மேட்டுப்பட்டி, என்.மேட்டுப்பட்டி, நென்மேனி, அப்பனேரி உள்ளிட்ட பகுதிகளைச் சேர்ந்த ஊராட்சி நிர்வாகிகள், முக்கிய பிரமுகர்கள் மற்றும் இருக்கன்குடி கோயில் நிர்வாகிகள் கலந்து கொண்டனர். 
மேலும் இக்கூட்டத்தில் திருவிழாவின் போது கோயிலுக்கு வரும் பக்தர்களுக்கு, தண்ணீர் வசதி, கழிப்பறை வசதி, நடமாடும் கழிப்பறை வசதி, தற்காலிக பேருந்து நிலையம் அமைப்பது உள்ளிட்ட பல்வேறு அடிப்படை வசதிகள் செய்து கொடுப்பது குறித்தும், காவல்துறையினர் சார்பில் பாதுகாப்பு ஏற்பாடுகள் செய்து கொடுப்பது குறித்தும் ஆலோசிக்கப்பட்டது.