வ.புதுப்பட்டியில் தீண்டாமை சுவரை அகற்றக் கோரி கிராம இளைஞர்கள் மனு

விருதுநகர் மாவட்டம், வத்திராயிருப்பு அருகே உள்ள வ.புதுப்பட்டியில் உள்ள தீண்டாமைச் சுவரை அகற்றக் கோரி, அக்கிராம இளைஞர்கள் மாவட்ட வருவாய் அலுவலரிடம் திங்கள்கிழமை மனு அளித்தனர். 
     அந்த மனுவில் கூறியிருப்பதாவது: வ. புதுப்பட்டி பேரூராட்சியில் பல்வேறு சமூகத்தினரும், தாழ்த்தப்பட்ட சமுதாயத்தைச் சேர்ந்தவர்களும் ஒரே தெருவில் வசித்து வந்தோம். பல ஆண்டுகளாக அவ்வழியாக தொடக்கப் பள்ளிக்கு குழந்தைகள் சென்றுவந்தனர். மேலும், தாழ்த்தப்பட்ட மக்கள் தேர்தலின்போது வாக்களிக்க அப்பள்ளியில் உள்ள வாக்குச் சாவடிக்கு சென்று வந்தனர்.
     இந்நிலையில், கடந்த 2010 இல் தெருவின் நடுவே 4 மீட்டர் நீளமும், 7 மீட்டர் உயரமும் கொண்ட சுவர் கட்டப்பட்டது. இதனால், குழந்தைகள் மற்றும் வாக்காளர்கள் பள்ளிக்கு சுமார் 1 கி.மீ. தொலைவு சுற்றியே செல்லவேண்டியுள்ளது. மேலும், கழிப்பறைக்கு பெண்கள் செல்ல முடியவில்லை. 
    இதனால், தாழ்த்தப்பட்ட சமூகத்தினர் கடும் பாதிப்புக்கு ஆளாகியுள்ளனர். எனவே, இந்த தீண்டாமை சுவரை உடனே அகற்ற மாவட்ட நிர்வாகம் நடவடிக்கை எடுக்கவேண்டும் என, அதில் குறிப்பிட்டுள்ளனர்.
     மேலும் அவர்கள் கூறுகையில், இது சர்வே எண்ணில் தெருப் பாதை என உள்ளது. ஆனால், வட்டாட்சியர் அதுகுறித்து பதில் தர மறுக்கிறார். இதன் காரணமாக, மாவட்ட வருவாய் அலுவலரை சந்தித்து மனு அளித்துள்ளோம் என்றனர்.