சாத்தூர் பேருந்து நிலையத்தில் தாய்மார்கள் பாலூட்டும் அறையை திறக்கக் கோரிக்கை

சாத்தூர் பேருந்து நிலையத்தில் பூட்டி கிடக்கும் தாய்மார்கள் பாலூட்டும் அறையை திறக்க பெண்கள் கோரிக்கை விடுத்துள்ளனர்.
 பேருந்து நிலையம் உள்ளிட்ட முக்கிய இடங்களில் தாய்மார்கள் தங்களின் குழந்தைகளுக்கு பாலூட்டுவதற்காக மின்விசிறி, இருக்கை வசதிகொண்ட அறை தமிழக அரசால் திறக்கப்பட்டது. சாத்தூர் பேருந்து நிலையத்திலும் நகராட்சி சார்பில் திறக்கப்பட்ட தாய்மார்கள் பாலூட்டும் அறை தற்போது பூட்டியே கிடக்கிறது.
 இதனால் பேருந்து நிலையத்துக்கு வரும் தாய்மார்கள் சிரமமடைந்து வருகின்றனர். இதுகுறித்துசமூக ஆர்வலர்கள் கூறியதாவது:
 சாத்தூர் பேருந்து நிலையத்தில் உள்ள தாய்மார்கள் பாலூட்டும் அறையின் சாவி, சாத்தூர் போக்குவரத்து பணிமனை பொறுப்பாளரிடம் ஒப்படைக்கப்பட்டுள்ளது. அவர்கள் பெரும்பாலான நேரங்களில் அறையை பூட்டி வைத்து விடுகின்றனர். இதனால், பேருந்து நிலையத்தில் தங்களது குழந்தைகளுக்கு பாலூட்டும் தாய்மார்கள் சிரமங்களை எதிர்கொள்கின்றனர். எனவே, சாத்தூர் பேருந்து நிலையத்தில் உள்ள தாய்மார்கள் பாலூட்டும் அறையை திறக்க நடவடிக்கை எடுக்க வேண்டும் என பொதுமக்களும், தாய்மார்களும் கோரிக்கை விடுத்துள்ளனர்.