ஓய்வு பெற்ற தமிழாசிரியருக்கு  வாழ்நாள் சாதனையாளர் விருது

ஸ்ரீவில்லிபுத்தூர், கிரீன் சிட்டி சுழற் சங்கம் சார்பில் நடைபெற்ற ஆசிரியர் தின விழாவில், ஓய்வு பெற்ற தமிழாசிரியர் புலவர் செ.பாலகிருஷ்ணனுக்கு வாழ்நாள் சாதனையாளர் விருது வழங்கப்பட்டது.
ஸ்ரீவில்லிபுத்தூர் அருகேயுள்ள மல்லி சுந்தரேஸ்வரி கல்வியியல் கல்லூரியில் புதன்கிழமை ஆசிரியர் தின விழா நடைபெற்றது. இதற்கு சுழற் சங்கத் தலைவர் ராஜசேகர் தலைமை வகித்தார். கல்லூயின் செயலாளர் ஆர்.ஏ.திலீபன்ராஜா முன்னிலை வகித்தார். ஓய்வு பெற்ற அரசுப் பள்ளி தமிழாசிரியரும், தற்போது இக் கல்லூரியில் மக்கள் தொடர்பு அலுவலராக பணிபுரிந்து வரும் புலவர் செ.பாலகிருஷ்ணனின் 55 ஆண்டு கல்வி, சமூக மற்றும் ஆன்மிக சேவையைப் பாராட்டி வாழ்நாள் சாதனையாளர் விருது சுழற் சங்கம் சார்பில் வழங்கப்பட்டது.
மேலும் கல்லூரியின் முதல்வர் பி.மல்லப்பராஜின் கல்வி சேவை, ஆளுமைத் திறன் மற்றும் தலைமைப் பண்பினைப் பாராட்டி சிறந்த கல்வியாளர் விருது வழங்கப்பட்டது. விருதினை தொகுதியின் எம்.எல்.ஏ. மு.சந்திரபிரபா முத்தையா வழங்கினார். நிகழ்ச்சியில் சுழற் சங்கத்தின் முன்னாள் துணை ஆளுநர் கே.லட்சுமி நாராயணன்,  செயலாளர் சண்முகநாதன், கல்லூரி பேராசிரியர் எம்.மாரியப்பன் ஆகியோர் வாழ்த்தி பேசினர். கே.வினோத்குமார் நன்றி கூறினார்.