கோவிலாங்குளம் நியாயவிலைக் கடை சீரமைக்கப்படுமா?

அருப்புக்கோட்டை அருகே கோவிலாங்குளத்தில் உள்ள நியாயவிலைக் கடை கட்டடம் இடிந்து விழும் நிலையில் உள்ளது. எனவே விபத்து ஏற்படும் முன்பு சீரமைக்க வேண்டுமென கிராம மக்கள் கோரிக்கை விடுத்துள்ளனர். 
 அருப்புக்கோட்டை - காரியாபட்டி செல்லும் சாலையில் கோவிலாங்குளம் ஊராட்சி உள்ளது. இங்குள்ள, தொடக்க வேளாண்மை கூட்டுறவு கடன் சங்க வளாகத்தில், கோவிலாங்குளம் நியாயவிலைக் கடை மற்றும் பெரிய கரிசல்குளம் நியாயவிலைக் கடை முதலானவை உள்ளன.
இதில் பெரிய கரிசல்குளம் நியாய விலைக் கடையில் 300-க்கும் மேற்பட்ட குடும்ப அட்டைதாரர்கள், தங்களுக்கு தேவையான அரிசி, சீனி உள்ளிட்ட அத்தியாவசிய பொருள்களை வாங்கிச் செல்வது வழக்கம். 
இந்நிலையில் இக்கடையின் மேற்கூரை மற்றும் பக்கவாட்டுச் சுவர் விரிசல் ஏற்பட்டு பழுதடைந்து காணப்படுகிறது. மேலும், சிமெண்ட் பூச்சுகளும் அவ்வப்போது, உடைந்து கீழே விழுகிறது. 
இதனால், நியாயவிலைக் கடைக்கு பொருள்கள் வாங்க வரும் பொதுமக்கள் விபத்தில் சிக்கி கொள்ளும் நிலையுள்ளது. மேலும், இக்கட்டடடம் பழுதடைந்தது குறித்து ஏற்கெனவே கூட்டுறவுத்துறை உயர் அதிகாரிகளுக்கு புகார் தெரிவிக்கப்பட்டுள்ளது.
 ஆனால், இதுவரை எந்த வித நடவடிக்கையும் எடுக்கப்படவில்லை என குடும்ப அட்டைதாரர்கள் புகார் தெரிவிக்கின்றனர். 
எனவே, சம்பந்தப்பட்ட நியாயவிலைக் கடையில் விபத்து ஏற்படுவதற்கு முன்னர், அக்கடையை சீரமைக்க மாவட்ட நிர்வாகம் நடவடிக்கை மேற்கொள்ள வேண்டும் என அக்கிராம மக்கள் கோரிக்கை விடுத்துள்ளனர்.