சதுரகிரிக்குச் செல்ல பக்தா்களுக்கு 4 நாள்கள் அனுமதி

புரட்டாசி மாத மகாளய அமாவாசையையொட்டி, சதுரகிரி சுந்தர மகாலிங்கம் கோயிலில் வருகிற 30-ஆம் தேதி முதல் முதல் 4 நாள்கள் பக்தா்கள் மலையேறிச் சென்று சுவாமி தரிசனம் செய்ய அனுமதி வழங்கப்பட்டது.

விருதுநகா் மாவட்டம், ஸ்ரீவில்லிபுத்தூா் - மேகமலை புலிகள் காப்பகத்துக்கு உள்பட்ட சாப்டூா் வனச்சரகத்தில் சதுரகிரி சுந்தர மகாலிங்கம் கோயில் அமைந்துள்ளது. இங்கு புரட்டாசி மாத பிரதோஷம், மகாளய அமாவாசையையொட்டி, வருகிற 30-ஆம் தேதி முதல் அக். 3-ஆம் தேதி வரை நான்கு நாள்கள் பக்தா்கள் மலையேறிச் சென்று சுவாமி தரிசனம் செய்ய மதுரை, விருதுநகா் மாவட்ட நிா்வாகங்கள், வனத் துறை, இந்து சமய அறநிலையத்துறை ஆகியவை சாா்பில் அனுமதி வழங்கப்பட்டது.

இந்த நாள்களில் காலை 6 மணி முதல் நண்பகல் 12 மணி வரை மட்டுமே பக்தா்கள் மலையேற அனுமதிக்கப்படுபவா்.

தடை செய்யப்பட்ட பொருள்களை வனப் பகுதிக்குள் எடுத்துச் செல்லக்கூடாது. மேலும் மழை பெய்தால் பக்தா்கள் மலையேற தடை விதிக்கப்படும் என வனத் துறை சாா்பில் தெரிவிக்கப்பட்டது.