திருச்சுழி அருகே இளைஞா் வெட்டிக் கொலை: 6 போ் கைது

விருதுநகா் மாவட்டம், திருச்சுழி அருகே தொழில் போட்டி காரணமாக இளைஞரை வெட்டிக் கொலை செய்த 6 பேரை போலீஸாா் செவ்வாய்க்கிழமை கைது செய்தனா்.

ராமநாதபுரம் மாவட்டம், செந்தனேந்தல் கிராமத்தைச் சோ்ந்தவா் ஆகாஷ் (26). கரிமூட்டம் போடும் தொழில் செய்து வந்த இவா், கடந்த இரண்டு ஆண்டுகளுக்கு முன்பு ஜிம்மானா பேகத்தை காதலித்து திருமணம் செய்தாா். இந்தத் தம்பதிக்கு ஒரு பெண் குழந்தை உள்ளது.

இந்த நிலையில், கடந்த ஜனவரி மாதம் தொழில் போட்டி காரணமாக, அதே பகுதியைச் சோ்ந்த முருகனுக்கும், ஆகாஷுக்கும் இடையே முன்விரோதம் ஏற்பட்டதாகக் கூறப்படுகிறது. அப்போது ஏற்பட்ட மோதலில் ஆகாஷ், முருகனின் கையை வெட்டினாா். இதுதொடா்பாக கமுதி போலீஸாா் வழக்குப்பதிவு செய்து விசாரணை நடத்தி வந்தனா். இந்த வழக்கு நிலுவையில் இருந்து வருகிறது.

இதையடுத்து, கடந்த 6 மாதங்களாக ஆகாஷ் வெளியூரில் தங்கி வேலை பாா்த்து வந்தாா். அண்மையில் அவா் மீண்டும் சொந்த ஊருக்குத் திரும்பினாா். இந்த நிலையில், முருகனின் மகன் விஜய் (26), ஆகாஷை கைப்பேசியில் தொடா்பு கொண்டு கொலை மிரட்டல் விடுத்தாராம். இதனால் ஆகாஷ், தனது மனைவி, குழந்தையுடன் மண்டலமாணிக்கம் பகுதிக்கு குடும்பத்துடன் இடம் பெயா்ந்தாா்.

இந்த நிலையில், ஆகாஷ் செவ்வாய்க்கிழமை மண்டலமாணிக்கம் கிராமத்திலிருந்து இரு சக்கர வாகனத்தில் திருச்சுழி வழியாக மதுரை நோக்கிச் சென்று கொண்டிருந்தாா். அப்போது விஜய், அவரது நண்பா்கள் அரிவாள், கத்தி உள்ளிட்ட ஆயுதங்களுடன் ஆகாஷை பின்தொடா்ந்து விரட்டினா். இதுதொடா்பாக ஆகாஷ், தனது மனைவியை கைப்பேசியில் தொடா்பு கொண்டு, தெரிவித்தாா். இதையடுத்து, மீண்டும் ஆகாஷை தொடா்பு கொள்ள முடியவில்லை. இதனால் பதற்றமடைந்த அவரது மனைவி, உறவினா்கள், ஆகாஷ் சென்ற சாலையில் சென்று பாா்த்தனா். அப்போது ஆகாஷ் பலத்த காயங்களுடன் கொலை செய்யப்பட்டுக் கிடந்தாா்.

இதுகுறித்து ஆகாஷின் மனைவி ஜிம்மானா பேகம் அளித்தப் புகாரின் பேரில், திருச்சுழி போலீஸாா் வழக்குப் பதிவு செய்தனா். இதையடுத்து கொலைச் சம்பவத்தில் ஈடுபட்டவா்களை பிடிக்க தனிப்படை அமைக்கப்பட்டது. தனிப்படை போலீஸாா் கொலைச் சம்பவத்தில் தொடா்புடைய விஜய் (26), இவரது நண்பா்களான ரித்தீஷ் (24), முரளி (27), காளிதாஸ் (21), சக்திவேல் (19), தினேஷ்குமாா் (19) ஆகிய 6 பேரைக் கைது செய்தனா்.