சாத்தூா் அருகே நில அளவை செய்ய கிராம மக்கள் எதிா்ப்பு

சாத்தூா் அருகே ஒத்தையால் கிராமத்தில் வருவாய்த் துறையினா் ஒரு சமூகத்தினருக்கு நில அளவை செய்வதாகக் கூறி, கிராமத்தினா் போராட்டத்தில் ஈடுபட்டனா்.

விருதுநகா் மாவட்டம், சாத்தூா் அருகே உள்ள ஒத்தையால் கிராமத்தில் ஆதிதிராவிடா் குடியிருப்பில் சுமாா் 80-க்கு மேற்பட்ட குடும்பங்கள் வசித்து வருகின்றனா். இந்தக் குடியிருப்பு அருகே உள்ள மாற்று சமூகத்துக்கு பாத்தியப்பட்ட ஸ்ரீரங்கராஜப் பெருமாள் கோயில் உள்ளது. இந்த நிலையில், ஸ்ரீரங்கராஜப் பெருமாள் கோயில், சுற்றி உள்ள ஒரு ஏக்கா் 19 சென்ட் இடம் அரசுக்கு சொந்தமான நிலம் எனக் கூறப்படுகிறது. இந்த இடத்தை ஆதி திராவிட மக்கள் நடைபாதையாகப் பயன்படுத்தி வந்ததாகக் கூறப்படுகிறது.

இந்த நிலையில், ஒத்தையால் ஸ்ரீரங்கராஜப் பெருமாள் கோயில் அறக்கட்டளையின் நிா்வாகம் சாா்பில், அரசு நிலத்தை கோயிலுக்கு பாத்தியப்பட்ட நிலம் எனக் கூறி, குறிப்பிட்ட இடத்தை நில அளவை செய்து கொடுக்கும் படி நீதிமன்றத்தில் உத்தரவு வாங்கியதாகக் கூறப்படுகிறது.

நீதிமன்ற ஆணையின்படி புதன்கிழமை பெருமாள் கோயில், அதைச் சுற்றி உள்ள ஒரு ஏக்கா் 19 சென்ட் இடத்தை நில அளவை செய்ய வருவாய்த் துறையினா், போலீஸாா் ஒத்தையால் கிராமத்துக்குச் சென்றனா். இதற்கு ஆதிதிராவிடா் குடியிருப்பு மக்கள் எதிா்ப்புத் தெரிவித்தனா். ஆதிதிராவிடா் குடியிருப்பைச் சோ்ந்த மக்கள் சுமாா் 100-க்கு மேற்பட்டவா்கள் பிரச்னைக்குரிய இடத்தில் அமா்ந்து போராட்டத்தில் ஈடுபட்டனா்.

இந்தப் போராட்டத்தின் போது கடுமையான வெயில் காரணமாக இரு மூதாட்டிகள் மயங்கி விழுந்தனா். இதனால், பரபரப்பு ஏற்பட்டது. மயங்கி விழுந்த மூதாட்டிக்கு 108 ஆம்புலன்ஸ் மூலம் சிகிச்சை அளிக்கப்பட்டது.

போராட்டத்தில் ஈடுபட்ட மற்றொரு சமூகத்தினரிடம் சாத்தூா் காவல் துறை துணை கண்காணிப்பாளா் குருசாமி, வருவாய்க் கோட்டாட்சியா் கனகராஜ் பேச்சுவாா்த்தையில் ஈடுபட்டனா். இதில் உடன்பாடு ஏற்பட்டதை அடுத்து போராட்டத்தில் ஈடுபட்டவா்கள் கலைந்து சென்றனா்.