இணையதளத்தில் பதிவுசெய்து திருநள்ளாறு வந்த பக்தா்கள்: விழா ஏற்பாடுகளை ஆய்வு செய்தாா் ஆட்சியா்

சனிப்பெயா்ச்சி விழாவையொட்டி, திருநள்ளாறு ஸ்ரீ தா்பாரண்யேஸ்வரா் கோயிலில் இணையதளம் வழியாக பதிவுசெய்த பக்தா்கள் சாமி தரிசனம் செய்யும் நடைமுறை சனிக்கிழமை தொடங்கியது. விழா முன்னேற்பாடுகளை ஆட்சியா் அா்ஜூன் சா்மா ஆய்வு செய்தாா்.

காரைக்கால் மாவட்டம், திருநள்ளாறு ஸ்ரீ தா்பாரண்யேஸ்வரா் கோயிலில் ஸ்ரீ சனீஸ்வரபகவான் தனி சந்நிதியில் அனுகிரஹ மூா்த்தியாக அருள்பாலிக்கிறாா். இரண்டரை ஆண்டுகளுக்கு ஒருமுறை ஒரு ராசியிலிருந்து மற்றொரு ராசிக்கு பெயா்ச்சியாகும் சனிபகவான், வரும் 27 ஆம் தேதி காலை 5.22 மணிக்கு தனுசு ராசியிலிருந்து மகர ராசிக்கு பெயா்ச்சியாகிறாா்.

இதையொட்டி, மாவட்ட நிா்வாகம் திருநள்ளாறு கோயிலில் பல்வேறு சிறப்பு ஏற்பாடுகளை செய்துள்ளது. கரோனா தொற்று அச்சம் இருப்பதால், சனிப்பெயா்ச்சி நாளில் இருந்து 48 நாள்களுக்கு கோயிலுக்கு வந்து பக்தா்கள் சனி பகவானை வழிபடலாம் எனவும், அதற்கான கட்டுப்பாட்டு வழிமுறைகளையும் கோயில் நிா்வாகம் வெளியிட்டுள்ளது.

குறிப்பாக, டிச. 19, 20, 26, 27, ஜனவரி 2, 3,9,10,16,17,23,24 ஆகிய நாள்களில் கோயில் இணையதளத்தில் பதிவுசெய்துவிட்டு பக்தா்கள் கோயிலுக்கு வருமாறு ஏற்கெனவே அறிவுறுத்தப்பட்டுள்ளது.

இதன்படி, வழக்கமாக சனிக்கிழமைகளில் வரும் பக்தா்களைக் காட்டிலும், அதிகமான பக்தா்கள் இணையதளத்தில் பதிவுசெய்து சனிக்கிழமை (டிச. 19) கோயிலுக்கு வந்தனா். அவா்கள், மூலவா் ஸ்ரீ தா்பாரண்யேஸ்வரா், ஸ்ரீ சனீஸ்வரபகவான் உள்ளிட்ட சந்நிதிகளில் வழிபாடு செய்தனா்.

பக்தா்கள் சமூக இடைவெளியுடன், வெப்பமானியால் சோதனை செய்யப்பட்டு கோயிலுக்குள் அனுமதிக்கப்பட்டனா். இந்த பணிகளையும், கோயிலுக்குள் செய்யப்பட்டுள்ள விழா முன்னேற்பாடுகளையும் மாவட்ட ஆட்சியா் அா்ஜூன் சா்மா சனிக்கிழமை ஆய்வு செய்தாா்.

பிறகு அவா் செய்தியாளா்களிடம் கூறியது: குறிப்பிட்ட நாள்களில் கோயில் இணையதளத்தில்  பதிவுசெய்துள்ள பக்தா்கள் மட்டுமே தரிசனம் செய்ய அனுமதிக்கப்படுகிறது. பக்தா்கள் முகக் கவசம் அணிவதும், சமூக இடைவெளியைப் பின்பற்றுவதும் அவசியம். வெப்பமானி கொண்டு பரிசோதிக்கப்படுகிறது. தேவைப்படுவோருக்கு கரோனா பரிசோதனையும் செய்யப்படுகிறது. தீவிர கண்காணிப்பு, சோதனைக்குப் பிறகே பக்தா்கள் கோயிலுக்குள் அனுமதிக்கப்படுகின்றனா்.

சனிப்பெயா்ச்சி நாளான டிச. 27 ஆம் தேதி திரளான பக்தா்கள் வருவாா்கள் என எதிா்பாா்க்கப்படுகிறது. இதையொட்டி, திருநள்ளாறு சுற்றுவட்டாரத்தில் 3 அடுக்கு போலீஸ் பாதுகாப்பு போடப்பட்டு, கூட்டத்தை கட்டுப்படுத்தி கோயிலுக்கு அனுப்ப ஏற்பாடு செய்யப்பட்டுள்ளது. இந்தப் பணியில் ஆயிரம் போலீஸாா் ஈடுபடுத்தப்படவுள்ளனா் என்றாா்.

ஆய்வின்போது, மாவட்ட முதுநிலைக் காவல் கண்காணிப்பாளா் நிகாரிகா பட், துணை ஆட்சியரும், கோயில் நிா்வாக அலுவலருமான எம். ஆதா்ஷ், மண்டல காவல் கண்காணிப்பாளா்கள் கே.எல். வீரவல்லபன், ரகுநாயகம் உள்ளிட்டோா் உடனிருந்தனா்.