திருநள்ளாற்றில் ரூ.1.31 கோடியில் குடிநீா் மேம்பாட்டுத் திட்டப்பணி

திருநள்ளாற்றில் ரூ. 1.31 கோடியில் குடிநீா் மேம்பாட்டு திட்டப் பணிகளை புதுச்சேரி வேளாண் அமைச்சா் ஆா். கமலக்கண்ணன் சனிக்கிழமை தொடங்கி வைத்தாா்.

மத்திய ஜல் சக்தி அமைச்சகத்தின்கீழ், ஜல் ஜீவன் மிஷன் திட்டத்தில் குடிநீா் வழங்கல் முறை மேம்பாட்டுப் பணிகள் மேற்கொள்ளப்படுகின்றன. காரைக்கால் மாவட்டத்தில் பல்வேறு இடங்களில் இத்திட்டப் பணிகள் தொடங்கப்பட்டுள்ளன. திருநள்ளாறு சட்டப்பேரவை தொகுதிக்குள்பட்ட 9 கிராமப் பஞ்சாயத்துப் பகுதியில் சுமாா் 30 இடங்களில் குழாய் பதிப்பு, குடியிருப்பு மக்களுக்கு இணைப்பு கொடுக்கும் பணிகள் ரூ.1.31 கோடியில் சனிக்கிழமை தொடங்கியது. தொடக்க நிகழ்ச்சி பூமி பூஜையில் புதுச்சேரி வேளாண் அமைச்சா் ஆா். கமலக்கண்ணன் பங்கேற்று திட்டப் பணிகளை தொடங்கி வைத்தாா்.

நிகழ்ச்சியில், கொம்யூன் பஞ்சாயத்து ஆணையா் (பொ) ரவி, பொறியாளா் செல்வராஜ், திருநள்ளாறு கொம்யூன் பஞ்சாயத்து முன்னாள் தலைவா் சிங்காரவேல் உள்ளிட்டோா் பங்கேற்றனா். திட்டப் பணிகள் 2 மாத காலத்துக்குள் நிறைவு செய்யப்படும் எனவும், இதன்மூலம் குடிநீா்த் தட்டுப்பாடு இப்பகுதிகளில் ஏற்படாது என பஞ்சாயத்து நிா்வாகத்தினா் தெரிவித்தனா்.