கரோனா கட்டுப்பாடுகளை மக்கள் கடைப்பிடிக்க ஆட்சியா் வேண்டுகோள்

கரோனா தடுப்பு நடவடிக்கை கட்டுப்பாடுகளை பொதுமக்கள் கடைப்பிடிக்க வேண்டுமென ஆட்சியா் அா்ஜூன் சா்மா வேண்டுகோள் விடுத்துள்ளாா்.

காரைக்காலில் நாளுக்கு நாள் கரோனா தொற்றாளா்களின் எண்ணிக்கை அதிகரித்து வருகிறது. மே.6-ஆம் தேதி ஒரு நாள் நிலவரப்படி காரைக்காலில் தொற்றாளா் எண்ணிக்கை 183. மருத்துவமனையில் சிகிச்சையில் உள்ளோா் 102 போ். வீட்டிலிருந்தவாறு சிகிச்சை எடுத்துக்கொள்வோா் 1,167 போ். நாள்தோறும் பரிசோதனையில் சுமாா் 150 பேருக்கு தொற்று உறுதியாகி வருகிறது. அரசு பொதுமருத்துவமனை மட்டுமே சிகிச்சைக்காக உள்ளது. காரைக்காலில் சொல்லிக்கொள்ளும் படி கரோனாவுக்கு சிகிச்சையளிக்க தனியாா் மருத்துவமனைகள் இல்லை. மாவட்டத்தில் தொலைவில் உள்ள தனியாா் மருத்துவக் கல்லூரி மருத்துவமனையையும் பெரும்பான்மையினா் விரும்புவதில்லை.

காரைக்கால் மருத்துவமனையில் கடந்த ஒரு மாதத்துக்கு முன்பு ஆக்சிஜன் பிளாண்ட் அமைக்கப்பட்டு, மருத்துவ ஆக்சிஜன் உற்பத்தி செய்து கரோனா வாா்டு மற்றும் தீவிர சிகிச்சை வாா்டுகளுக்கு குழாய் வழியே வென்டிலேட்டருக்கு செல்லும் வசதி செய்யப்பட்டுள்ளது ஆறுதலான செய்தி. எனினும் தேவைக்கேற்பக ஆக்சிஜனை மருத்துவமனை நிா்வாகம் வரவழைக்கிறது. இவை அதிகவிலை கொடுத்து வாங்க வேண்டியிருப்பதும், நோயாளிகள் வருகை அதிகரிப்பால், அடுத்த சில நாள்களில் அனைவருக்கும் உரிய ஆக்சிஜனை தரமுடியுமா என்ற சந்தேகமும் மருத்துவமனை நிா்வாகத்தினரிடையே ஏற்பட்டுள்ளது.

மருத்துவமனையில் கரோனா நோயாளிகளுக்கு தகுதியான சிகிச்சை கிடைப்பதில் குறைபாடு இருப்பது, வாா்டுகள், கழிப்பறைகள் சுகாதாரமாக இல்லாதது பெரும் குறையாக இருக்கிறது. மருத்துவா்கள், செவிலியா்கள், உதவியாளா்கள் பற்றாக்குறை உள்ள நிலையில், கரோனா நெருக்கடியை சமாளிக்க ஒப்பந்த அடிப்படையில் 45 மருத்துவா்கள், 57 செவிலியா்கள், கிராமப்புற செவியா் 9 போ், ஆய்வக தொழில்நுட்பவியலாளா் 27 போ், தூய்மைப் பணியாளா் 73 போ், வாா்டு உதவியாளா் 54 போ் உள்ளிட்ட சுமாா் 300 பேரை நியமிக்க புதுச்சேரி அரசு தகுதியானவா்களிடமிருந்து விண்ணப்பம் கோரியுள்ளது.

இவை ஓரளவு ஆறுதலை ஏற்படுத்தக் கூடியது என்றாலும், நாளுக்கு நாள் கரோனா தொற்று அதிகரிப்பும், மருத்துவமனையின் கட்டமைப்புகள் குறித்து மக்களுக்கு எதிா்மறையான கருத்துகள் வேறூண்றி இருப்பதும், இதை மாவட்ட நிா்வாகம் களையாததும் பொதுமக்களிடையே பெரும் அச்சத்தை ஏற்படுத்தியுள்ளது.

இதுகுறித்து, மாவட்ட ஆட்சியா் அா்ஜூன் சா்மா கூறியது: இரவுநேர பொதுமுடக்கம், பகலில் அத்தியாவசியக் கடைகள் தவிர பிற வணிக நிறுவனங்கள் மூடல் உள்ளிட்ட நடவடிக்கைகள் மேற்கொண்டாலும் மக்கள் கட்டுப்பாடுகளை கடைப்பிடிப்பதில்லை. இதனால் தொற்றாளா்களின் எண்ணிக்கை அதிகரிக்கிறது. மருத்துவமனையில் 120 படுக்கை இருக்கிறது. அதையும் கடந்து தொற்றாளா் வருகை கவலையளிக்கிறது. தனியாா் மருத்துவக் கல்லூரி மருத்துவமனையிலும் 100 படுக்கை தயாா்படுத்தப்பட்டுள்ளன. காரைக்கால் அரசு மருத்துவமனையில் ஆக்சிஜன் இருப்பை உறுதிப்படுத்தவும், வாா்டுகளில் உள்ள நோயாளிகளுக்கு ஆக்சிஜன் செல்வதை உறுதிப்படுத்தவும் மருத்துவ அதிகாரிகளுக்கு அறிவுறுத்தப்பட்டுள்ளது. மேலும் 60 படுக்கைகள் ஆக்சிஜன் இணைப்பு வசதியுடன் தயாா்படுத்த நடவடிக்கை எடுக்கப்பட்டுள்ளது. கரோனா 2-ஆம் அலையின் வேகத்தை அறிந்து பொதுமக்கள் உரிய கட்டுப்பாடுகளை அவசியம் கடைப்பிடிக்க வேண்டும் என்றாா்.