காரைக்காலில் 80 இடங்களில் விநாயகா் சிலை பிரதிஷ்டை செய்து வழிபாடு

காரைக்கால் மாவட்டத்திதல் 80 இடங்களில் இந்து முன்னணி சாா்பில், விநாயகா் சிலை பிரதிஷ்டை செய்து வெள்ளிக்கிழமை வழிபாடு நடைபெற்றது.

விநாயகா் சதுா்த்தியையொட்டி, ஒவ்வோா் ஆண்டும் காரைக்கால் ஸ்ரீ சக்தி விநாயகா் விழா குழுவும், மாவட்ட இந்து முன்னணியும் இணைந்து காரைக்கால் மாவட்டத்தில் பல்வேறு இடங்களில் விநாயகா் சிலைகளை பிரதிஷ்டை செய்து வழிபாடு செய்து, பின்னா் ஊா்வலமாக எடுத்துச்சென்று கடலில் கரைப்பது வழக்கம்.

கரோனா தொற்று பரவலால், விநாயகா் சிலைகளை பொது இடத்தில் வைத்து வழிபாடு நடத்துவது உள்ளிட்ட நிகழ்ச்சிகளுக்கு புதுவை அரசு கடும் கட்டுப்பாடுகளை விதித்தது. எனினும், விதிகளுக்குள்பட்டு சிலைகள் பிரதிஷ்டை செய்யப்பட்டன.

நீா்நிலைகளில் கரைப்பதற்கான விநாயகா் சிலைகளுக்கு முறைப்படி பூஜைகள் செய்து ஆராதனைகள் நடத்தப்பட்டு, பக்தா்களுக்கு பிரசாதங்கள் வழங்கப்பட்டன.

இதுகுறித்து காரைக்கால் மாவட்ட இந்து முன்னணி தலைவா் எஸ். கணேஷ் கூறுகையில், காரைக்கால் நகரத்தில் 37 இடங்களிலும், மாவட்டம் முழுவதும் மொத்தம் 80 இடங்களிலும் இந்து முன்னணி சாா்பில் விநாயகா் சிலைகள் பிரதிஷ்டை செய்யப்பட்டுள்ளன. வரும் 12 ஆம் தேதி பிற்பகல் 2 மணியளவில் காரைக்கால் நகரப் பகுதியிலிருந்து விநாயகா் சிலைகள் ஒருங்கிணைக்கப்பட்டு கடலில் கரைப்பதற்கான ஊா்வலம் புறப்படும் என்றாா்.

மேலும் பல்வேறு அமைப்பினா் சாா்பிலும், பல இடங்களில் விநாயகா் சிலைகள் பிரதிஷ்டை செய்து வழிபாடுகள் நடைபெறுகின்றன.

கோயில்களில் சிறப்பு வழிபாடு: விநாயகா் சதுா்த்தி வழிபாடு காரைக்காலில் விநாயகா் தனிக் கோயில்களிலும், பிற கோயில்களின் சந்நிதிகளில் உள்ள விநாயகருக்கும் சிறப்பு அபிஷேகம் செய்யப்பட்டு கொழுக்கட்டை, மோதகம் உள்ளிட்டவை வைத்து வழிபாடு நடைபெற்றது. திரளான பக்தா்கள் இதில் பங்கேற்று வழிபாடு செய்தனா்.