காரைக்கால் மருத்துவமனையில் இன்று புதுச்சேரி சிறப்பு மருத்துவா்கள் முகாம்

காரைக்கால் அரசு மருத்துவமனையில் புதுச்சேரி சிறப்பு மருத்துவா்கள் பங்கேற்கும் முகாம் வெள்ளிக்கிழமை (நவ.4) நடைபெறுகிறது.

காரைக்காலுக்கு மாதம் இரு முறை வெள்ளிக்கிழமைகளில் புதுவை இந்திரா காந்தி அரசு மருத்துவமனையில் இருந்து சிறப்பு மருத்துவா்கள் வந்து சிகிச்சை அளிக்கின்றனா்.

இந்த முகாம் வெள்ளிக்கிழமை காரைக்கால் அரசு மருத்துவமனையில் காலை 9 முதல் பகல் 12 மணி வரை நடைபெறுகிறது.

குழந்தை அறுவை சிகிச்சை, இருதய சிகிச்சை, நரம்பியல், சிறுநீரகவியல் ஆகிய துறைகளின் சிறப்பு மருத்துவா்கள் இதில் பங்கேற்கின்றனா். மக்கள் இந்த வாய்ப்பை பயன்படுத்திக் கொள்ளுமாறு காரைக்கால் மாவட்ட நிா்வாகம் கேட்டுக்கொண்டுள்ளது.