காரைக்காலில் வ.உ.சி. சிலை நிறுவ புதுவை முதல்வரிடம் வலியுறுத்தப்படும்: அமைச்சா் சந்திர பிரியங்கா

காரைக்காலில் வ.உ.சி. சிலை நிறுவ, புதுவை முதல்வரிடம் வலியுறுத்தப்படும் என்றாா் அமைச்சா் சந்திர பிரியங்கா.

காரைக்கால் மாவட்ட சோழிய வேளாளா் நலச் சங்கம் சாா்பில், வ.உ.சி. 150 ஆவது பிறந்த ஆண்டு நிறைவு, பொதுத் தோ்வில் அதிக மதிப்பெண் பெற்ற மாணவா்களுக்குப் பாராட்டு, சோழிய வேளாளா் சமூகத்தைச் சோ்ந்த பல்வேறு தரப்பினரை கெளரவித்தல் என முப்பெரும் விழா சனிக்கிழமை நடைபெற்றது.

சங்கத் தலைவா் பி.எஸ்.ஆா். சின்னையன் தலைமை வகித்தாா். பொதுச் செயலா் அமுதா, ஆா். ஆறுமுகம் ஆகியோா் முன்னிலை வகித்து, வ.உ.சி.யின் பெருமைகளைப் பேசினா். புதுவை போக்குவரத்துத் துறை அமைச்சா் சந்திர பிரியங்கா, சட்டப்பேரவை உறுப்பினா்கள் ஏ.எம்.எச். நாஜிம், எம். நாகதியாகராஜன் ஆகியோா் சிறப்பு அழைப்பாளா்களாகப் பங்கேற்று வ.உ.சி. உருவப்படத்துக்கு மலா்தூவி மரியாதை செலுத்தினா்.

காரைக்காலில் வ.உ.சி. சிலை நிறுவவேண்டும், மத்திய ஓபிசி பட்டியலில் சோழிய வேளாளா் சமூகத்தை சோ்க்கவேண்டும் என சங்கத்தினா் வலியுறுத்தினா். அமைச்சா் பேசுகையில், இதுகுறித்து புதுவை முதல்வரின் கவனத்துக்கு கொண்டு செல்வதாக தெரிவித்தாா்.

நிகழ்ச்சியில், நலவழித் துறை துணை இயக்குநராக இருந்து ஓய்வுபெற்ற குழந்தைகள் நல மருத்துவா் பி. நாராயணசாமிக்கு மருத்துவத் திலகம் விருது, உதவிப் பேராசிரியா் டி. தேவசேனாதிபதி, வரிச்சிக்குடி அப்பு என்ற எஸ். ரமேஷ் ஆகியோருக்கு சேவைச் செம்மல் விருதை அமைச்சா் வழங்கி கெளரவித்தாா்.

காரைக்கால் மாவட்டத்தில் பல்வேறு தேவஸ்தானத்தின் அறங்காவல் வாரியத்தில் இடம்பெற்றுள்ள சமூகத்தினா், சங்கம் சாா்பில் கெளரவிக்கப்பட்டனா். கடந்த கல்வியாண்டில் 10, பிளஸ் 2 பொதுத் தோ்வில் அதிக மதிப்பெண் பெற்ற மாணவ, மாணவியருக்கு கல்வி ஊக்கப் பரிசு வழங்கப்பட்டது.