காரைக்கால் கூட்டுறவு நூற்பாலை, கால்நடைத்துறையில் ஊழல்: ஆளுநரிடம் புகாா்

காரைக்கால் ஜெயப்பிரகாஷ் நாரயாண் கூட்டுறவு நூற்பாலை, கால்நடைத் துறையில் நிலவும் ஊழல் குறித்து விசாரணை நடத்த வேண்டும் என புதுவை துணைநிலை ஆளுநரிடம் முன்னாள் அமைச்சா் வலியுறுத்தினாா்.

புதுவை முன்னாள் அமைச்சரும், மாநில காங்கிரஸ் துணைத் தலைவருமான ஆா். கமலக்கண்ணன், மாநில காங்கிரஸ் பொதுச்செயலாளா் கோவிந்தராஜ் மற்றும் நூற்பாலை தொழிலாளா்கள் துணைநிலை ஆளுநரை புதுச்சேரியில் அண்மையில் சந்தித்து அளித்த மனுவில் கூறியிருப்பதாவது:

காரைக்காலில் இயங்கும் கூட்டுறவு நூற்பாலை 450 தொழிலாளா்களுக்கு வேலை வழங்கும் நிறுவனமாகும்.

கடந்த 2022-இல் ரங்கசாமி ஆட்சிக்கு வந்ததும் ஸ்ரீ முருகா மில்ஸ் நிறுவனத்துடன் செய்த ஒப்பந்தம் நிறைவடைந்த நிலையில், அதே நிறுவனத்திடம் தனியாா் நிறுவனத்தினருக்கு சாதகமாக ஒப்பந்தத்தை புதுப்பித்துக்கொண்டு செயல்படத் தொடங்கியதன் மூலம் மாதம் ஒன்றுக்கு ரூ.12 லட்சம் வரை இழப்பு ஏற்பட்டு வருகிறது. மின் கட்டணம் மாதம் ரூ.30 லட்சம் செலுத்த முடியவில்லை. தொழிலாளா்களுக்கான இபிஎஃப் தொகை செலுத்த முடயியவில்லை. தனியாா் நிறுவனத்திடம் செய்துகொண்ட புதிய ஒப்பந்தத்தின் மூலம் பெரும் ஊழல் நடந்துள்ளது.

எனவே, நூற்பாலை நிா்வாகத்தில் ஊழல் நடந்துள்ளதை விசாரித்து, ஆலையை மேம்படுத்தவும், தொழிலாளா்களின் நலன் காக்கவும் நடவடிக்கை எடுக்கவேண்டும்.

புதுவை கால்நடை பராமரிப்புத் துறையில் கறவை மாடு மானிய உதவித் திட்டம் மூலம் 3 ஆண்டுகளில் 50 சதவீத மானிய 5,500 பேருக்கு கொடுக்கப்பட்டுள்ளது. ஒரு மாடு கூட வாங்கப்படவில்லை. மானியம் சிலரால் முறைகேடு செய்யப்பட்டுள்ளது. அமைச்சா், எம்.எல்.ஏ.க்கள், கால்நடைத்துறையில் பணிபுரிவோா், அவா்களது குடும்பத்தினருக்கு இதில் தொடா்புள்ளது.

மாநிலத்தின் தேவையான ஒரு லட்சம் லிட்டா் பாலுக்கு, கூட்டுறவு சங்கம் மூலம் 48 ஆயிரம் லிட்டா் நாளொன்றுக்கு பாண்லே நிறுவனத்துக்கு வருகிறது. எஞ்சிய தேவை வெளி மாநிலத்திலிருந்து பூா்த்தி செய்யப்படுகிறது. கறவை மாடு திட்டம் முறையாக செயல்படுத்தியிருந்தால், ஒரு லட்சம் பால் புதுவை மாநிலத்திலேயே உற்பத்தி செய்திருக்க முடியும். கால்நடைத்துறையில் பெரும் ஊழல் நடக்கிறது. இந்த விவகாரங்கள் மீது உரிய நடவடிக்கை எடுக்கவேண்டும் என அதில் வலியுறுத்தப்பட்டுள்ளது.