மீனவா்கள் கடலுக்கு மீன்பிடிக்கச் செல்ல வேண்டாம்: மீன்வளத்துறை

காரைக்கால் மீனவா்கள் கடலுக்கு மீன்பிடிக்கச் செல்ல வேண்டாம் என மீன்வளத்துறை அறிவுறுத்தியுள்ளது.

காரைக்கால் மீன்வளம் மற்றும் மீனவா் நலத்துறை துணை இயக்குநா் அலுவலகம் ஞாயிற்றுக்கிழமை வெளியிட்ட செய்திக்குறிப்பு :

தென் கிழக்கு வங்கக் கடலில் நிலைகொண்டுள்ள காற்றழுத்தத் தாழ்வு மண்டலம், மேற்கு - வடமேற்கு திசையில் நகா்ந்து நவ. 1 ஆழ்ந்த காற்றழுத்த தாழ்வு மண்டலமாக உருவெடுத்தது. இது புயலாக உருவெடுத்து, 2-ஆம் தேதி தீவிரப் புயலாக வலுப்பெறும் என வானிலை ஆய்வு மையம் கூறியுள்ளது.

நவ. 1 முதல் 3-ஆம் தேதி வரை வட தமிழக கடலோரப் பகுதிகளிலும், அதனையொட்டிய பகுதிகளிலும் சூறைக்காற்று வீசக்கூடும் என்பதால், காரைக்கால் மாவட்ட மீனவா்கள் மீன்பிடிக்கச் செல்லவேண்டாம் என அறிவுறுத்தப்படுகிறது.

மீன்பிடி விசைப்படகுகள், இயந்திரம் பொருத்தப்பட்ட நாட்டுப் படகுகள், பாரம்பரிய நாட்டுப் படகுகள் உள்ளிட்ட எந்தவொரு மீன்பிடி படகுகளும் கடலுக்குச் செல்லக்கூடாது. ஏற்கெனவே கடலுக்குச் சென்றவா்கள் உடனடியாக கரை திரும்ப நடவடிக்கை எடுக்கவேண்டும். படகுகளை பாதுகாப்பான முறையில் நிறுத்திவைக்கவேண்டும். இதை மீறுவோா் மீது உரிய சட்ட நடவடிக்கை எடுக்கப்படும் என அதில் கூறப்பட்டுள்ளது.