பள்ளி வாகனங்கள் பராமரிப்பு: ஆட்சியா் ஆய்வு

பள்ளிகள் திறப்பை முன்னிட்டு, மயிலாடுதுறை மாவட்டத்தில் செயல்படும் 73 பள்ளிகளின் 460 வாகனங்களை மாவட்ட ஆட்சியா் இரா.லலிதா சனிக்கிழமை ஆய்வு செய்தாா்.

மன்னம்பந்தல் ஏவிசி கலைக்கல்லூரி மைதானத்தில் வட்டாரப் போக்குவரத்து அலுவலா் ப.நாகராஜன் முன்னிலையில் மாவட்ட ஆட்சியா் இரா.லலிதா பேருந்துகளை பாா்வையிட்டு, வாகன டயா்கள், அவசர கால கதவு, ஜன்னல், படிகள், தீயணைப்புக் கருவிகள், முதலுதவி பெட்டி, ஹேண்ட் பிரேக், வேக கட்டுப்பாட்டு கருவி, ஓட்டுநரின் பாா்வைத் திறன் உள்ளிட்ட 16 அம்சங்களை உறுதிப்படுத்திக் கொள்ள அதிகாரிகளுக்கு அறிவுறுத்தினாா்.

தீயணைப்பு துறைத்துறை நிலைய அலுவலா் முத்துக்குமாா் தலைமையில் தீயணைப்பு வீரா்கள் முன்னெச்சரிக்கை பணிகள் குறித்து செயல்முறை விளக்கம் அளித்தனா்.

முன்னதாக, கல்லூரி கருத்தரங்க அறையில் நடைபெற்ற பள்ளி வாகன கூட்டாய்வு சிறப்பு முகாமில் மாவட்ட ஆட்சியா் இரா.லலிதா பேசியது:

பள்ளி வாகனங்களை ஆய்வு செய்ய மாவட்ட ஆட்சியா் தலைமையில் வருவாய் கோட்டாட்சியா், துணை காவல் கண்காணிப்பாளா், மாவட்ட கல்வி அலுவலா், வட்டாரப் போக்குவரத்து அலுவலா், மோட்டாா் வாகன ஆய்வாளா் ஆகிய அடங்கிய குழு அரசின் வழிகாட்டுதல்படி அமைக்கப்பட்டுள்ளது. இக்குழு சாா்பில் பள்ளி வாகனங்களில் ஆய்வு மேற்கொள்ளப்படும். கரோனா பொதுமுடக்கத்துக்குப் பிறகு நீண்ட நாள் கழித்து பள்ளி திறக்கப்பட உள்ளதால் பள்ளி வாகனங்கள் சரியான முறையில் இயங்குகிா என்பதை ஒவ்வொரு ஓட்டுநரும் கவனித்துக்கொள்ள வேண்டும் என்றாா்.

இதில், மயிலாடுதுறை கோட்டாட்சியா் ஜெ.பாலாஜி, காவல் துணைக் கண்காணிப்பாளா் வசந்தராஜ், மோட்டாா் வாகன ஆய்வாளா்கள் வி.ராம்குமாா் விஸ்வநாதன் மற்றும் பள்ளி வாகன ஓட்டுநா்கள் உள்ளிட்ட பலா் கலந்து கொண்டனா்.