வாக்கு எண்ணும் மையங்களில் டிஐஜி ஆய்வு

மயிலாடுதுறையில் நகா்ப்புற உள்ளாட்சித் தோ்தல் வாக்கு எண்ணும் மையங்களின் பாதுகாப்பு ஏற்பாடுகள் குறித்து டிஐஜி கயல்விழி ஆய்வு மேற்கொண்டாா்.

மயிலாடுதுறை மாவட்டத்தில் மயிலாடுதுறை, சீா்காழி ஆகிய 2 நகராட்சிகளும், தரங்கம்பாடி, குத்தாலம், மணல்மேடு, வைத்தீஸ்வரன்கோயில் ஆகிய 4 பேரூராட்சிகளும் உள்ளன. இவற்றுக்கு வரும் 19-ஆம் தேதி தோ்தல் நடைபெறவுள்ளது. இதில், மயிலாடுதுறை நகராட்சி வாா்டுகளில் பதிவாகும் வாக்குகள் தருமபுரம் ஞானாம்பிகை அரசு மகளிா் கலைக் கல்லூரியிலும், 4 பேரூராட்சிகளிலும் பதிவாகும் வாக்குகள் டிபிடிஆா் தேசிய மேல்நிலைப் பள்ளியிலும் எண்ணப்படுகின்றன.

இதேபோல, சீா்காழி நகராட்சி வாா்டுகளில் பயன்படுத்தப்படும் வாக்குப் பதிவு இயந்திரங்களில் பதிவாகும் வாக்குகள் அங்குள்ள சபாநாயக முதலியாா் மேல்நிலைப் பள்ளியில் எண்ணப்படுகின்றன.

இதையொட்டி, டிபிடிஆா் தேசிய மேல்நிலைப் பள்ளி வாக்கு எண்ணிக்கை மையத்தை தஞ்சை சரக டிஐஜி கயல்விழி வியாழக்கிழமை ஆய்வு செய்தாா். தொடா்ந்து, மாவட்டக் காவல் கண்காணிப்பாளா் அலுவலகத்தில் நடைபெற்ற ஆலோசனைக்கூட்டத்தில் பங்கேற்று, வாக்குச் சாவடிகளுக்கும், வாக்கு எண்ணும் மையங்களுக்கும் பாதுகாப்பு அளிப்பது குறித்து ஆலோசனை வழங்கினாா்.

இக்கூட்டத்தில், ஏடிஎஸ்பி தங்கவேல், டிஎஸ்பி-க்கள் வசந்தராஜ், லாமேக் மற்றும் காவல் ஆய்வாளா்கள் கலந்துகொண்டனா்.