புனித அந்தோணியாா் திருத்தலத்தில் தோ்பவனி

மயிலாடுதுறை புனித அந்தோணியாா் திருத்தல ஆண்டு திருவிழாவையொட்டி வெள்ளிக்கிழமை நடைபெற்ற தோ்பவனி மற்றும் திருப்பலியில் திரளானோா் பங்கேற்றனா்.

மயிலாடுதுறையில் பிரசித்தி பெற்ற புனித பதுவை மற்றும் வனத்து அந்தோணியாா் திருத்தல ஆண்டு திருவிழா ஜன. 7-ஆம் தேதி கொடியேற்றத்துடன் தொடங்கியது. தொடா்ந்து 10 நாள்கள் மன்றாட்டு மாலை, நவநாள் ஜெபம், திருப்பலி உள்ளிட்ட பல்வேறு வழிபாட்டு நிகழ்வுகள் நடைபெற்றன.

வெள்ளிக்கிழமை முதல் நிகழ்வாக சிறப்பு திருப்பலி நடைபெற்றது. மயிலாடுதுறை மறைவட்ட அதிபா் தாா்சிஸ்ராஜ் அடிகளாா் தலைமையில் நடைபெற்ற திருப்பலியில் ‘நான் தாழ்ந்திட, அவா் உயா்ந்திட‘ என்ற இறைவாா்த்தையை மையப்படுத்தி மறையுரையாற்றி ஆசி வழங்கினாா்.

இந்த சிறப்பு திருப்பலியில் அந்தோணியாா் திருத்தல பங்குத்தந்தை தேவதாஸ் இக்னேஷியஸ் அடிகளாா் மற்றும் உதவி பங்குத்தந்தை மனோஜ் சேவியா் அடிகளாா் உலக அமைதிக்காகவும், விவசாயம் செழிக்கவும், இயற்கை பேரிடா் பாதிப்புகளிலிருந்து மக்கள் பாதுகாக்கப்படவும், மனிதநேயம் நிலைத்திடவும் வேண்டி மறைவட்ட அருட்தந்தையா்கள் மற்றும் மக்களோடு இணைந்து சிறப்பு பிராா்த்தனை வழிபாடு நடத்தினா்.

தொடா்ந்து புனித அந்தோணியாா் திருத்தல ஆண்டு திருவிழாவின் முக்கிய நிகழ்வான திருத்தோ் பவனி நடைபெற்றது. புனித மைக்கேல் சம்மனசு, புனித ஆரோக்கியநாதா், புனித செபஸ்தியாா், புனித ஆரோக்கியமாதா, புனித பதுவை மற்றும் வனத்து அந்தோணியாா்களின் திருஉருவம் தாங்கிய ஐந்து தோ்கள் இன்னிசை முழங்க, வானவேடிக்கையுடன் ஆலய வளாகத்தில் தொடங்கி, கொண்டாரெட்டித்தெரு, அழகப்பசெட்டித்தெரு உள்ளிட்ட வீதிகள் வழியாக மீண்டும் ஆலயத்தை வந்தடைந்தது. (படம்).

10 நாள்கள் நடைபெற்ற திருவிழா கொடியிறக்கத்துடன் நிறைவு பெற்றது.