இருசக்கர வாகன பாதுகாப்பக உரிமையாளருக்கு கொலை மிரட்டல்

கீழையூர் அருகே இருசக்கர வாகனப் பாதுகாப்பக உரிமையாளருக்கு குடிபோதையில் கொலை மிரட்டல் விடுத்ததாக 2 பேர் மீது போலீஸார் வழக்குப் பதிந்துள்ளனர்.

திருப்பூண்டி, பெரியகடைத் தெருவைச் சேர்ந்தவர் பழனிதுரை மகன் செந்தில்குமார் (40). இவர் திருப்பூண்டி, மூலக்கடைத் தெருவில் இருசக்கர வாகனப் பாதுகாப்பகம் வைத்துள்ளார்.

இரு தினங்களுக்கு முன்பு இரவு 11 மணியளவில் திருப்பூண்டி, காரை நகரைச் சேர்ந்த பாண்டியன், அசோக் ஆகிய இருவரும் குடிபோதையில் மிதிவண்டி பாதுகாப்பகத்துக்கு வந்தனர். அங்கு செந்தில்குமாரிடம் தகராறு செய்து அவரைக் கம்பியால் தாக்கி கொலை மிரட்டல் விடுத்தனர். காயமடைந்த செந்தில்குமார் நாகை அரசு மருத்துவமனையில் சிகிச்சை பெற்றார்.

இதுகுறித்து செந்தில்குமார் அளித்த புகாரின் பேரில் கீழையூர் போலீஸார் வெள்ளிக்கிழமை வழக்குப் பதிந்து விசாரித்து வருகின்றனர்.