வனமகோத்ஸவ வார விழா நிறைவு

நாகை மாவட்டம், சீர்காழி சட்டநாதபுரத்தில் உள்ள சுபம் வித்யாமந்திர் பப்ளிக் பள்ளியில் வனமகோத்ஸவ வார விழா அண்மையில் நிறைவடைந்தது.
இப்பள்ளியில் வனமகோத்ஸவ விழா கடந்த 2-ஆம் தேதி தொடங்கியது. நிகழ்ச்சியை சுபம் லிட்டில் ஏஞ்சல் பள்ளி தாளாளர் ஹர்ஷாசுதேஷ் குத்துவிளக்கு ஏற்றி தொடங்கிவைத்தார். முதல் நாள் நிகழ்ச்சியில் பள்ளியின் பசுமைக்குழு சார்பில், வனப் பாதுகாப்பு பற்றிய கருத்தரங்கம் நடைபெற்றது. 2-ஆம் நாள் பசுமைப்புரட்சி குறித்து ஓவியப் போட்டிகள் நடைபெற்றன. 3-ஆம் நாள் வனங்களின் பாதுகாப்பு குறித்து மாணவ, மாணவியரின் மாறுவேட போட்டிகள் நடைபெற்றன. 4-ஆம் நாள் வினா- விடை போட்டிகளும், 5-ஆம் நாள் சுற்றுச்சூழல் மேம்பாட்டின் அவசியம் குறித்து கலைநிகழ்ச்சிகளும் நடைபெற்றன. 6-ஆம் நாள் நிறைவில் சீர்காழி ச.மு.இ. மேல்நிலைப்பள்ளி உடற்கல்வி இயக்குநர் முரளிதரன் தலைமையில், மரக்கன்றுகள் நடும் நிகழ்ச்சி நடைபெற்றது. பள்ளி தாளாளர் சுதேஷ்ஜெயின் முன்னிலை வகித்து போட்டிகளில் வெற்றி பெற்ற மாணவ-மாணவியருக்குப் பரிசுகளை வழங்கினார்.