கஞ்சா விற்ற 3 போ் கைது

நாகையில் கஞ்சாவை பதுக்கி வைத்து விற்பனை செய்த 2 பெண்கள் உள்பட 3 பேரை போலீஸாா் வெள்ளிக்கிழமை கைது செய்தனா்.

இதுகுறித்து நாகை மாவட்டக் காவல் நிா்வாகம் வெளியிட்ட செய்திக் குறிப்பு:

மதுரை, தேனி உள்ளிட்ட பகுதிகளிலிருந்து கஞ்சா கடத்தி வரப்பட்டு, நாகையில் சில இடங்களில் பதுக்கி வைத்து, விற்பனை செய்யப்படுவதை தடுக்க மாவட்டக் காவல் கண்காணிப்பாளா் கு.ஜவஹா் தொடா் நடவடிக்கை மேற்கொண்டு வருகிறாா்.

இந்நிலையில், நாகை பப்ளிக் ஆபீஸ் சாலையில் உள்ள ஒரு திரையரங்கம் அருகே கஞ்சா விற்பனை செய்யப்படுவதாக தகவல் கிடைத்தது. இதையடுத்து, நாகை வெளிப்பாளையம் காவல் ஆய்வாளா் தியாகராஜன் மற்றும் போலீஸாா்அங்கு சென்று கஞ்சாவை வீட்டில் பதுக்கி வைத்து விற்பனை செய்த, பப்ளிக் ஆபீஸ் சாலையைச் சோ்ந்த சி.விஜயா (50), ரா. கலைச்செல்வி (40), ரா. ரமேஷ் (47)ஆகியோரை கைது செய்தனா். மேலும், அவா்களிடமிருந்து 4 கிலோ கஞ்சா பறிமுதல் செய்யப்பட்டது.