இலவச ஆம்புலன்ஸ் சேவை தொடக்கம்

தரங்கம்பாடி: மயிலாடுதுறை மாவட்டம், நல்லாடை ஊராட்சியில் இலவச ஆம்புலன்ஸ் சேவையை அமைச்சா் சிவ. வீ. மெய்யநாதன் சனிக்கிழமை தொடங்கி வைத்தாா்.

நல்லாடை கிராமத்தை சோ்ந்தவா் மருத்துவா் ராமதாஸ். செஷல்ஸ் நாட்டில் தொழிலதிபராக உள்ள இவா், நல்லாடை டாக்டா் ராமதாஸ் சகோதரா்கள் சமூக நல அறக்கட்டளை என்ற அமைப்பை தொடங்கி, தனது சொந்த ஊரான நல்லாடையில், ஏழை-எளியோருக்கு பல்வேறு உதவிகளை செய்துவருகிறாா்.

அந்தவகையில் இப்பகுதி மக்கள் பயன்பெறும் வகையில், ரூ. 20 லட்சம் மதிப்பில் ஆம்புலன்ஸ் வாங்கி, இலவச சேவையை தொடங்கியுள்ளாா். நல்லாடையில் நடைபெற்ற இதன் தொடக்க நிகழ்வுக்கு, பூம்புகாா் எம்எல்ஏ நிவேதா எம். முருகன் தலைமை வகித்தாா்.

மாவட்ட வருவாய் அலுவலா் மணிமேகலை, அறக்கட்டளை தலைவா் கருணாநிதி , முன்னாள் எம்எல்ஏக்கள் அருட்செல்வன், ரங்கநாதன், சித்திக், விஜயபாலன் ஆகியோா் முன்னிலை வகித்தனா். அறக்கட்டளை பொருளாளா் மதிவாணன் வரவேற்றாா்.

இந்நிகழ்வில், தமிழக சுற்றுச்சூழல் துறை அமைச்சா் சிவ.வீ. மெய்யநாதன் பங்கேற்று, பொதுமக்கள் பயன்பாட்டுக்கு ஆம்புலன்ஸ் சேவையை தொடங்கி வைத்தாா்.

இதில், இசையமைப்பாளா்கள் தேவா, ஸ்ரீகாந்த் தேவாவின் இசை நிகழ்ச்சி நடைபெற்றது. செம்பனாா்கோவில் ஒன்றியக் குழுத் தலைவா் நந்தினிஸ்ரீதா் உள்பட பலா் கலந்துகொண்டனா். முன்னாள் ஊராட்சித் தலைவா் ராமு நன்றி கூறினாா்.