திருக்கண்ணமங்கை-அம்மையப்பன் சாலை சீரமைப்பு

"தினமணி' செய்தி எதிரொலியாக, திருக்கண்ணமங்கை- அம்மையப்பன் சாலை சீரமைக்கப்பட்டுள்ளது.
திருவாரூர் மாவட்டம், திருக்கண்ணமங்கை- அம்மையப்பன் சாலை மிகவும் மோசமான நிலையில், குண்டும், குழியுமாக கடந்த 2 ஆண்டுகளுக்கும் மேலாக காட்சியளித்தது. இதனால், வாகன ஓட்டிகள் கடும் இன்னல்களுக்குள்ளாயினர். இந்த சாலையைச் சீரமைக்குமாறு இப்பகுதி மக்கள் பல்வேறு நிலைகளில் அரசுக்கு கோரிக்கை விடுத்தனர்.  இந்நிலையில், இங்கு புதிதாக சாலை அமைக்கக் கோரி, "தினமணி'யில் அண்மையில், "உயிர் பலிக்கு காத்திருக்கும் சாலை' என்ற தலைப்பில் செய்தி வெளியானது. இதைத் தீவிரமாக கருதிய சம்பந்தப்பட்ட அதிகாரிகள், இந்த சாலையை சீரமைத்து பொதுமக்களின் பயன்பாட்டுக்கு கொண்டு வந்துள்ளனர். இதனால், இப்பகுதி மக்கள் குறிப்பாக பள்ளி, கல்லூரி மாணவியர் மிகுந்த பயனடைந்து வருகின்றனர்.
திருவாரூர்- தஞ்சை சாலையையும், திருவாரூர்- கும்பகோணம் சாலையையும் இணைக்கும் பிரதான குறுக்குச் சாலையாக இந்த சாலை விளங்குவது குறிப்பிடத்தக்கது.