திருவாரூர் கேந்திரிய வித்யாலயா பள்ளியில் பிளஸ் 1 தொடங்கக் கோரிக்கை

திருவாரூர் மத்தியப் பல்கலைக்கழகத்தில் செயல்படும் கேந்திரிய வித்யாலயா பள்ளியில் பிளஸ் 1 வகுப்பு தொடங்க நடவடிக்கை மேற்கொள்ள வேண்டும் என கோரிக்கை விடுக்கப்பட்டுள்ளது. 
திருவாரூர் தமிழ்நாடு மத்தியப் பல்கலைக்கழக வளாகத்தில் செயல்படும் கேந்திரிய வித்யாலயா பள்ளியில் பத்தாம் வகுப்பு வரை உள்ளது. பத்தாம் வகுப்பு முடிக்கும் மாணவர்கள் பிளஸ் 1 வகுப்பு படிக்கும் வகையில் வகுப்புகள் தொடங்க வேண்டும், ஆனால் இப்பள்ளியை நிர்வகிக்கும் மத்தியப் பல்கலைக்கழகம் இதுவரை அதற்கான பணிகளை தொடங்கவில்லை. இதுகுறித்து, பெற்றோர்கள் பல்கலைக்கழக துணைவேந்தர் ஏ.பி. தாஷை சந்தித்து முறையிட்டனர். ஆனால், பல்கலைக்கழக தரப்பில் பிளஸ் 1 வகுப்பு தொடங்க போதுமான நிதி இல்லை என தெரிவித்ததாக கூறப்படுகிறது. 
இதையடுத்து, பெற்றோர்கள் ஒருங்கிணைந்து அடுத்த கட்ட நடவடிக்கைகள் குறித்த ஆலோசனைக் கூட்டத்தில் புதன்கிழமை ஈடுபட்டனர். கூட்டத்தில், பிளஸ் 1 வகுப்பு தொடங்க உரிய நடவடிக்கை எடுக்க மத்திய அரசிடம் முறையிடுவது, பெரும்பாலும் தற்காலிக ஆசிரியர்களே உள்ள இப்பள்ளியில் மத்திய அரசால் பள்ளிக்கு தகுதியான ஆசிரியர்களை நியமிக்க கோருவது உள்ளிட்ட தீர்மானங்கள்
நிறைவேற்றப்பட்டன.