நீடாமங்கலத்தில் 2 இடங்களில் சாலை மறியல்: போக்குவரத்து பாதிப்பு 

திருவாரூர் மாவட்டம், நீடாமங்கலம் பகுதியில் குடிநீர் கோரி, 2 இடங்களில் பெண்கள் காலிக்குடங்களுடன் திங்கள்கிழமை சாலை மறியலில் ஈடுபட்டனர். இதனால், போக்குவரத்து பாதிப்பு ஏற்பட்டது.
கஜா புயல் காரணமாக நீடாமங்கலம் ஒன்றியத்துக்குள்பட்ட கிராம ஊராட்சிகளில், மின்விநியோகம் தடைப்பட்டதால், மேல்நிலை நீர்த்தேக்கத் தொட்டிகளில் தண்ணீர் நிரப்ப இயலாமல், கடந்த 4 நாள்களாக பொதுமக்கள் மிகவும் அவதிப்பட்டு வருகின்றனர். இதன் காரணமாக ஜெனரேட்டர் மூலம் மேல்நிலை நீர்தேக்கத் தொட்டிகளில் நீர் நிரப்ப நடவடிக்கை எடுக்கப்பட்டு வருகிறது.
இது தவிர, வெளிமாவட்டங்களிலிருந்து வரவழைக்கப்பட்ட 7 நடமாடும் ஜெனரேட்டர்கள் மூலம் கிராமப்புறங்களில் உள்ள மேல்நிலை நீர்த்தேக்கத் தொட்டிகளில் தண்ணீர் நிரப்பப்பட்டு வருகிறது. 
சாலை மறியல்: இதனிடையே, குடிநீர் தட்டுப்பாட்டைக் கண்டித்து, நீடாமங்கலம் அருகேயுள்ள அண்ணாநகர் பகுதி மக்கள்  திங்கள்கிழமை காலை நீடாமங்கலம்- தஞ்சாவூர் சாலையில் அமர்ந்து, மறியல் போராட்டத்தில் ஈடுபட்டனர். இதில், பெரும்பாலான பெண்கள் காலிக்குடங்களுடன் கலந்துகொண்டனர்.
தகவலறிந்து வந்த நீடாமங்கலம் போலீஸார் மற்றும் அரசு அதிகாரிகள், சாலை மறியலில் ஈடுபட்டவர்களுடன் பேச்சுவார்த்தை  நடத்தினர். இதைத்தொடர்ந்து, மறியல் போராட்டம் கைவிடப்பட்டது. இதனால், நீடாமங்கலம்- தஞ்சாவூர் சாலையில் சுமார் ஒரு மணிநேரம் போக்குவரத்து பாதிக்கப்பட்டது. 
இதேபோல், கானூர் பருத்திக்கோட்டை  கிராம மக்கள் குடிநீர் கோரி, நீடாமங்கலம்- மன்னார்குடி சாலையில் உள்ள புதுரோடு பகுதியில், சாலை மறியலில் ஈடுபட்டனர். போலீஸார் மற்றும் வருவாய்த்துறையினர் பேச்சுவார்த்தை நடத்தியதையடுத்து, மறியல் போராட்டம் விலக்கிக் கொள்ளப்பட்டது. இதனால், சுமார் ஒரு மணிநேரம் போக்குவரத்து பாதிக்கப்பட்டது.