சட்டம் படித்த மாற்றுத் திறனாளிகள் நிதியுதவி பெற விண்ணப்பிக்கலாம்

திருவாரூர் மாவட்டத்தில் சட்டப்படிப்பு படித்த மாற்றுத் திறனாளிகள் நிதியுதவி பெற விண்ணப்பிக்கலாம் என தெரிவித்துள்ளார் மாவட்ட ஆட்சியர் இல. நிர்மல்ராஜ். 
இதுகுறித்து அவர் வெளியிட்ட செய்திக் குறிப்பு: 2018-2019-ஆம் நிதியாண்டுக்கு சட்டப் படிப்பு படித்த மாற்றுத் திறனாளி பட்டதாரிகள் தங்களை வழக்குரைஞர்களாக பதிவு செய்து கொள்வதற்குரிய கட்டணம் செலுத்துவதற்கும், தேவையான சட்டப் புத்தகங்கள் வாங்கிக் கொள்ளவும் வழங்கப்பட்டு வரும் நிதியுதவி ரூ. 3 ஆயிரத்திலிருந்து ரூ. 10 ஆயிரமாக உயர்த்தி வழங்கப்பட உள்ளது. 
எனவே, 2018-2019ஆம் நிதியாண்டுக்கான சட்டப் படிப்பு படித்த (முற்றிலும் கண் பார்வையற்றவர்கள் மற்றும் உடல் ஊனமுற்றவர்கள்) தகுதியான மாற்றுத் திறனாளிகளுக்கு நிதியுதவி வழங்கப்படவுள்ளது. தகுதியான மாற்றுத் திறனாளிகள் முழு சுயவிவரம், மாற்றுத் திறனாளிக்கான தேசிய அடையாள அட்டை, வழக்குரைஞராக பதிவு செய்த எண் இவற்றின் நகலுடன் மாவட்ட ஆட்சியர் அலுவலக வளாகத்தில் உள்ள மாவட்ட மாற்றுத் திறனாளிகள் நல அலுவலகத்துக்கு செப்.25-ஆம் தேதிக்குள் விண்ணப்பித்து பயன்பெறலாம்.