நீடாமங்கலத்தில் அதிகரிக்கும் போக்குவரத்து நெரிசல்: காவலர்களை நியமிக்கக் கோரிக்கை

திருவாரூர் மாவட்டம், நீடாமங்கலத்தில் ரயில்வே கேட் மூடப்பட்டதால் புதன்கிழமை அடிக்கடி போக்குவரத்து நெரிசல் ஏற்பட்டது. இதனால் பேருந்து பயணிகள், பாதசாரிகள் உள்ளிட்ட பலரும் கடும் அவதிக்குள்ளாகினர். போக்குவரத்தை ஒழுங்குபடுத்த காவலர்களை நியமிக்க வேண்டுமென பொதுமக்கள் கோரிக்கை விடுத்துள்ளனர்.
சென்னையிலிருந்து அதிகாலை 4.45 மணிக்கு நீடாமங்கலம் வழியாக மன்னார்குடி செல்லும் மன்னை விரைவு ரயில், புதன்கிழமை 2.45 மணிநேரம் தாமதமாக, அதாவது காலை 7.30 மணிக்குத்தான் சென்றது. 
பின்னர், மயிலாடுதுறை பயணிகள் ரயில் மன்னார்குடியிலிருந்து காலை 8.30 மணிக்கு புறப்பட்டு, நீடாமங்கலம் வழியாக திருவாரூர் சென்றடைந்தது.
இதனிடையே, சரக்கு ரயில் பெட்டிகள் வருகை காரணமாக நீடாமங்கலம் ரயில் நிலையத்துக்கு பயணிகள் ரயில்கள், விரைவு ரயில்கள் புதன்கிழமை காலை அரை மணிநேரம் தாமதமாக வந்தன. இதன் காரணமாக அடிக்கடி ரயில்வே கேட் மூடப்பட்டதால், ஏராளமான வாகனங்கள் சாலையின் இருபுறமும் எதிர் எதிரே அணிவகுத்து நிற்க வேண்டிய நிலை ஏற்பட்டது. மேலும், முகூர்த்த நாள் என்பதால் இருசக்கர வாகனங்களும் ஏராளமாக சாலைகளில் நின்றன. போக்குவரத்து நெருக்கடியால் பேருந்து பயணிகள், பாதசாரிகள் உள்பட அனைத்து தரப்பினரும் கடும் அவதிக்குள்ளாகினர்.
போக்குவரத்து காவலர்களை நியமிக்க வேண்டும்: நீடாமங்கலத்தில் இதுபோன்று அடிக்கடி போக்குவரத்து நெருக்கடி ஏற்படுவதால், போக்குவரத்தை ஒழுங்குபடுத்த போக்குவரத்து காவலர்களை நியமித்திட திருவாரூர் மாவட்ட காவல் கண்காணிப்பாளர் விக்ரமன் நடவடிக்கை வேண்டும் என பொதுமக்களும், வர்த்தகர்களும் கோரிக்கை விடுத்துள்ளனர்.
மேலும், ரயில்வே கேட் மூடப்படும்போது, விதிகளை மீறி இருசக்கர வாகனங்களில் செல்பவர்கள் ரயில்வே கேட்டை கடந்து செல்லும் அபாயமும் நிலவுகிறது. இதை ரயில்வே போலீஸார் கண்காணித்து, உரிய நடவடிக்கை எடுக்க வேண்டுமென பொதுமக்கள் கோரிக்கை விடுத்துள்ளனர்.