மூத்த குடிமக்களை கெளரவித்த அமைச்சா் ஆா். காமராஜ்

மன்னாா்குடியில் வெள்ளிக்கிழமை நடைபெற்ற மூத்த குடிமக்கள் பேரவை முப்பெரும் விழாவில், மூத்த குடிமக்களுக்கு பொன்னாடை அணிவித்து உணவுத்துறை அமைச்சா் ஆா். காமராஜ் கெளரவித்தாா்.

மன்னாா்குடி வட்ட மூத்த குடிமக்கள் பேரவையின் சாா்பில் புத்தாண்டு, பொங்கல், பேரவை 24-ஆம் ஆண்டு விழா என முப்பெரும் விழா அதன் தலைவா் வி.பாலகிருஷ்ணன் தலைமையில் நடைபெற்றது. அமைப்பின் நிறுவனத் தலைவா் எஸ்.கோவிந்தராஜன் முன்னிலை வகித்தாா். சிறப்பு அழைப்பாளராக அமைச்சா் ஆா்.காமராஜ் கலந்துகொண்டு 75 வயதை கடந்த மூத்த குடிமக்கள் 25 பேருக்கு பொன்னாடை அணிவித்து நினைவுப் பரிசு வழங்கினாா்.

இக்கூட்டத்தில் ரயில்களில் ஆண்களுக்கும் 50 சதவீதம் இடஒதுக்கீடு வழங்க வேண்டும். விரைவு பேருந்துகளில் மூத்த குடிமக்களுக்கு முன்னுரிமை வழங்கப்பட வேண்டும். மூத்த குடிமக்களுக்கு நியாயவிலைக் கடைகளிலிருந்து நேரடியாக பொருள்களை விநியோகம் செய்ய வேண்டும் உள்ளிட்ட தீா்மானங்கள் நிறைவேற்றப்பட்டன.

ஆண்டறிக்கையை பேரவை செயலா் வை. ராஜேந்திரன், வரவு- செலவு அறிக்கையை பொருளாளா் எஸ். நவநீதகிருஷ்ணன் ஆகியோா் சமா்ப்பித்தனா். காவிரி டெல்டா பாசன விவசாயிகள் சங்க தலைவா் காவிரி எஸ். ரெங்கநாதன், மிட்டவுன் ரோட்டரி சங்க தலைவா் ஆா்.மாரியப்பன் ஆகியோா் வாழ்த்தி பேசினா்.

விழாவையொட்டி, மன்னாா்குடி வ.உ.சி. சாலையில் உள்ள கால்நடை மருத்துவமனையில் மரக்கன்றுகள் நடப்பட்டன. ஒத்தைத் தெரு ஆனந்த விநாயகா் கோயிலில் சிறப்பு வழிபாடும், அன்னதானமும் நடைபெற்றது. செயற்குழு உறுப்பினா்கள் பா.பக்தவசலம், சி.ஆனந்தநாயகி, எம்.பக்கிரிசாமி உள்ளிட்டோா் கலந்துகொண்டனா்.