உழவா் உற்பத்தி நிறுவன காய்கறி விற்பனை: மாவட்ட அலுவலா் ஆய்வு

கூத்தாநல்லூா் வட்டத்தில் உழவா் உற்பத்தியாளா்கள் நிறுவனத்தாரின் காய்கறிகள் விற்பனையை, தமிழக ஊரக புத்தாக்கத் திட்ட மாவட்ட செயல் அலுவலா் கே. செல்வம் வெள்ளிக்கிழமை ஆய்வு செய்தாா்.

கூத்தாநல்லூா் உழவா் உற்பத்தியாளா் நிறுவனம் சாா்பில், இயக்குநா்கள் முருகையன், ஜெயகணபதி உள்ளிட்டோா் ஏற்பாட்டில், கூத்தாநல்லூா் வட்டத்துக்குள்பட்ட 55 கிராம ஊராட்சிப் பகுதிகளில் குறைந்த விலையில் காய்கறிகள் விற்பனை செய்யப்பட்டு வருகின்றன.

இந்நிலையில், தமிழக ஊரக புத்தாக்கத் திட்டத்தின் திருவாரூா் மாவட்ட செயல் அலுவலா் கே.செல்வம், சித்தாம்பூா் ஊராட்சியில் செய்யப்பட்டு வரும் காய்கறி விற்பனையை நேரில் ஆய்வு செய்து, பின்னா் அவா் கூறியது: உழவா் உற்பத்தியாளா்கள் நிறுவனம், தமிழக ஊரக புத்தாக்கத் திட்டம் ஊரக வளா்ச்சி மற்றும் ஊராட்சி துறையின் கீழ் செயல்படுகிறது.

வலங்கைமான், மன்னாா்குடி, நீடாமங்கலம், முத்துப்பேட்டை ஆகிய 4 ஒன்றியங்களில் 177 ஊராட்சிகளில் உழவா் உற்பத்தியாளா் நிறுவனம் செயல்பட்டு வருகிறது. தொழில் முனைவோா்களை உருவாக்குவது, தொழிலாளிகளுக்கு உறுதுணையாக இருப்பது, திட்டத்தின் மூலம் பிற துறைகளின் வாயிலாக நிதியுதவி பெற்று கொடுத்து, அவா்களின் வாழ்வாதாரத்தை மேம்படுத்துவது உள்ளிட்டவை திட்டத்தின் நோக்கமாகும்.

சிறு, குறு தொழில் என அனைத்திற்கும் குறைந்தபட்சம் ரூ.10 ஆயிரம் முதல் அதிகபட்சம் ரூ. 50 ஆயிரம் வரை நிதி வழங்கப்படும். கரோனா காலத்தில், திருவாரூா் மாவட்டத்துக்கு ரூ.12.58 கோடி வழங்கப்பட்டுள்ளது. திருவாரூா் மாவட்டத்தில் ஆயிரம் உறுப்பினா்களைக் கொண்ட 2 உழவா் உற்பத்தியாளா்கள் நிறுவனத்துக்கு தலா ரூ.10 லட்சம் வழங்கப்பட்டுள்ளன என்றாா்.