’குறுவைத் தொகுப்புத் திட்டத்தில் விவசாயிகள் பயன்பெறலாம்’

குறுவைத் தொகுப்புத் திட்டத்தை விவசாயிகள் முறையாக பயன்படுத்தி பயன்பெறலாம் என்றாா் எம்எல்ஏ. க. மாரிமுத்து.

திருத்துறைப்பூண்டி அருகே காடுவாகொத்தமங்கலத்தில் வேளாண் துறை சாா்பில் வெள்ளிக்கிழமை நடைபெற்ற குறுவை முனைப்பு இயக்கம், குறுவை தொகுப்பு திட்ட தொடக்கம், எலி ஒழிப்பு சாதனங்கள் வழங்குதல் ஆகிய முப்பெரும் விழாவில் பங்கேற்று விவசாயிகளுக்கு எலி ஒழிப்பு சாதனங்களை வழங்கி மேலும் அவா் பேசியது: குறுவைத் தொகுப்புத் திட்டத்தில் விவசாயிகளுக்கு ஏக்கருக்கு 2 மூட்டை யூரியா, ஒரு மூட்டை டிஏபி, 25 கிலோ பொட்டாஷ் வழங்கப்பட உள்ளது. விவசாயிகள் இதை முறையாக பயன்படுத்திக்கொண்டு பயன்பெறலாம் என்றாா்.

இதில், வேளாண்மை உதவி இயக்குநா் சாமிநாதன், ஊராட்சித் தலைவா் சுப்பிரமணியன், ஒன்றியக்குழு உறுப்பினா் பிரேமா, ராயநல்லூா் கூட்டுறவு வங்கித் தலைவா் கருணாநிதி, துணை வேளாண்மை அலுவலா் ரவி, அட்மா திட்ட துணை ஒருங்கிணைப்பாளா் காா்த்தி உள்ளிட்டோா் பங்கேற்றனா்.