டிஎன்பிஎஸ்சி குரூப் 4 தோ்வு: திருவாரூா் மாவட்டத்தில் 27,710 போ் பங்கேற்பு

திருவாரூா்: திருவாரூா் மாவட்டத்தில், தமிழ்நாடு அரசுப் பணியாளா் தோ்வாணையம் (டிஎன்பிஎஸ்சி) நடத்திய குரூப்-4 தோ்வை 27,710 போ் எழுதினா்.

இத்தோ்வு, தமிழகம் முழுவதும் ஞாயிற்றுக்கிழமை நடைபெற்றது. இதற்காக, திருவாரூா் மாவட்டத்தில் திருவாரூா், குடவாசல், மன்னாா்குடி, நன்னிலம், நீடாமங்கலம், திருத்துறைப்பூண்டி, வலங்கைமான் ஆகிய 7 மையங்களில் 124 தோ்வறைகள் ஏற்படுத்தப்பட்டிருந்தன.

குரூப் 4 தோ்வு எழுத, திருவாரூா் மாவட்டத்தில் 34,532 போ் விண்ணப்பித்திருந்தனா். இதில் 6,522 போ் தோ்வுக்கு வராத நிலையில், 27,710 போ் தோ்வில் பங்கேற்றனா். அந்த வகையில், 80.24 சதவீதம் போ் தோ்வெழுதினா்.

தோ்வில் எவ்வித முறைகேடுகளும் நடைபெறாமல் இருக்க 124 முதன்மைக் கண்காணிப்பாளா்கள், 30 நடமாடும் கண்காணிப்புக் குழுக்கள், 13 பறக்கும் படைகள், 124 ஆய்வு அலுவலா்கள், 131 விடியோ ஒளிப்பதிவாளா்கள் நியமிக்கப்பட்டு, கண்காணிக்கப்பட்டன.

திருவாரூா் வேலுடையாா் மேல்நிலைப் பள்ளி மற்றும் அம்மையப்பன் பாரத் கேட்டரிங் கல்லூரி தோ்வு மையங்களில் நடைபெற்ற குரூப் 4 தோ்வை, மாவட்ட ஆட்சியா் தி. சாருஸ்ரீ பாா்வையிட்டு ஆய்வு செய்தாா்.

அப்போது, வருவாய் கோட்டாட்சியா் சங்கீதா, வட்டாட்சியா் செந்தில் உள்ளிட்ட அரசு அலுவலா்கள் உடனிருந்தனா்.