மக்களவைத் தேர்தலில் போட்டியிட எம்எல்ஏக்களுக்கு வாய்ப்பு கிடையாது: ஆம் ஆத்மி அறிவிப்பு

வரும் மக்களவைத் தேர்தலில் போட்டியிட ஆம் ஆத்மிக் கட்சியின் தற்போதைய எம்எல்ஏக்களுக்கு வாய்ப்பு வழங்கப்படாது என்று ஆம் ஆத்மி தலைமை அறிவித்துள்ளது.
இது தொடர்பாக அக்கட்சியின் தில்லி பொறுப்பாளர் கோபால் ராய் அளித்த பேட்டி: மக்களவைத் தேர்தலில் போட்டியிட பெரும்பாலான ஆம் ஆத்மி எம்எல்ஏக்கள் விருப்பம் தெரிவித்துள்ளனர். ஆனால், இப்போது எம்எல்ஏவாக இருப்பவர்களுக்கு மக்களவைத் தேர்தலில் போட்டியிட வாய்ப்பு வழங்குவதில்லை என்று கட்சித் தலைமை தீர்மானித்துள்ளது. மேலும், தேர்தல் அறிவிக்கை வெளியிடப்படுவதற்கு முன்பாக தில்லி, ஹரியாணா, பஞ்சாப் ஆகிய மாநிலங்களில் போட்டியிடவுள்ள ஆம் ஆத்மி வேட்பாளர்களின் பெயர்கள் அறிவிக்கப்படும். இந்தத் தேர்தலை ஆம் ஆத்மி தனியாகவே எதிர்கொள்ளவுள்ளது. காங்கிரஸ் கட்சியுடன் கூட்டணி அமைத்துப் போட்டியிடாது என்றார் அவர். 
ஆம் ஆத்மி கட்சி தில்லியில் ஆளும் கட்சியாகவும், பஞ்சாப் மாநிலத்தில் எதிர்க்கட்சியாகவும் உள்ளது. மேலும், வரும் மக்களவைத் தேர்தலில் தில்லி, ஹரியாணாவில் அனைத்துத் தொகுதிகளிலும், கோவா உள்ளிட்ட மற்ற மாநிலங்களில் தேர்ந்தெடுக்கப்பட்ட சில தொகுதிகளிலும் தனித்துப் போட்டியிடுவது என ஆம் ஆத்மி தலைமை முடிவு செய்துள்ளது.